بۇل جونىندە وبلىستىق جۇمىلدىرۋ دايىندىعى جونىندەگى باسقارماسى ءمالىم ەتتى، دەپ حابارلايدى قازاقپارات ءتىلشىسى.
دارياداعى ەڭ قالىڭ مۇز قازالى، ارال اۋداندارىندا بايقالىپ وتىر. ول اۋماقتاردا مۇزدىڭ قالىڭدىعى 35-70 سانتيمەتر شاماسىندا. ال وبلىستىڭ وڭتۇستىگىندە ورىن تەپكەن جاڭاقورعان، شيەلى اۋماعىنداعى داريا بويىندا مۇز مۇلدەم جوق. ول سىرداريا، جالاعاش، قارماقشىدا 25-40 سانتيمەترگە جۋىقتايدى.
ال وبلىس ورتالىعى - قىزىلوردا قالاسى ماڭىنداعى «كوپەس» ساياجايى تۇسىندا، قىزىلوردا سۋ تورابىنان 10 شاقىرىم جوعارىدا سەڭ جۇرۋدە. مۇزدىڭ قالىڭدىعى 10-15 سانتيمەتر. ال سىرداريا وزەنىنەن سەكۋندىنا 245 تەكشەمەتر سۋ وتۋدە. قازىرگى تاڭدا سىرداريا وزەنىندەگى سۋ دەڭگەيى ءبىرقالىپتى.
«دەگەنمەن سۋ باسۋ اۋماعىندا ورنالاسقان ساياجاي تۇرعىندارى مەن شارۋاشىلىق يەلەرى قاۋىپسىزدىك شارالارىن ساقتاعانى ءجون. اكىمدىك پەن توتەنشە جاعداي دەپارتامەنتى تاراپىنان ەسكەرتۋ العان جاعدايدا ۋاقىتشا كوشۋ ماسەلەلەرىن (ەۆاكۋاتسيالىق پۋنكتكە) قاراستىرعانى دۇرىس»، - دەيدى جۇمىلدىرۋ دايىندىعى باسقارماسىنىڭ ماماندارى.