ستوكگولمدەگى حالىقارالىق بەيبىتشىلىكتى زەرتتەۋ ينستيتۋتىنىڭ 11- ناۋرىزدا جاريالاعان ەسەبى بويىنشا، سوڭعى بەس جىلدا الەمدە ساتىلعان قارۋ-جاراقتىڭ 34 پايىزى ا ق ش- تىڭ ۇلەسىندە. قارۋ-جاراق ەكسپورتتايتىن ەكىنشى ءىرى ەل - رەسەيدىڭ ۇلەسى 20 پايىزعا جۋىق.
SIPRI مالىمەتىنشە، ا ق ش- تىڭ الەمدىك قارۋ-جاراق ەكسپورتىنداعى ۇلەسى 2008-2012-جىلدارى 30 پايىزعا جۋىق بولعان.
«باراك وباما اكىمشىلىگى تۇسىندا قول قويىلعان كەلىسىمدەرگە ساي، ا ق ش- تىڭ 2013-2017-جىلدارى ەكسپورتتاعان قارۋ-جاراق كولەمى 1990-جىلداردىڭ سوڭىنان بەرگى ەڭ جوعارعى كورسەتكىشكە جەتتى. 2017-جىلى جاسالعان مامىلەلەر مەن كەلىسىمشارتتارعا سۇيەنىپ، ا ق ش الداعى جىلداردا دا ەڭ ءىرى قارۋ-جاراق ەكسپورتتاۋشى ەلگە اينالادى دەۋگە بولادى» دەدى SIPRI- ءدىڭ قارۋلانۋ جانە اسكەري شىعىندار باعدارلاماسىنىڭ ديرەكتورى اۋد فلەرانت.
SIPRI مالىمەتىنە قاراعاندا، ا ق ش 98 مەملەكەتكە قارۋ-جاراق پەن اسكەري تەحنيكا ساتقان. ا ق ش بۇل ەلدەرگە نەگىزىنەن اسكەري جانە جۇك ۇشاقتارىن ەكسپورتتاعان.
زەرتتەۋ ينستيتۋتى رەسەيدىڭ 47 ەلگە جانە ۋكراينا شىعىسىنداعى رەسەيشىل سەپاراتيستەرگە قارۋ-جاراق ەكسپورتتاعانىن ايتادى. جالپى العاندا، سوڭعى بەس جىلدا رەسەيدىڭ قارۋ-جاراق ەكسپورتى كولەمى الدىڭعى بەس جىلمەن سالىستىرعاندا جەتى پايىزعا ازايعان.
قارۋ-جاراق ەڭ كوپ ەكسپورتتايتىن العاشقى بەستىككە فرانسيا (6,7 پايىز)، گەرمانيا جانە قىتاي ەنگەن.
«ازاتتىق»