نۇرسۇلتان نازاربايەۆ ۆلاديمير پۋتين تۋرالى: ول - سوزىندە بەرىك تۇراتىن جان

استانا. قازاقپارات - قازاقستان پرەزيدەنتى نۇرسۇلتان نازاربايەۆ «ءبىرىنشى ارناعا» بەرگەن سۇحباتىندا رەسەي باسشىسى ۆلاديمير پۋتين تۋرالى ءوز پىكىرىن ءبىلدىردى، دەپ حابارلايدى قازاقپارات ءتىلشىسى.

«مەملەكەت باسشىلارىنىڭ اراسىنداعى قارىم-قاتىناس وتە ماڭىزدى. كوشباسشىلار اراسىنداعى سەنىم مەملەكەتتەر اراسىنداعى سەنىمگە جەتەلەيدى. ۆلاديمير ۆلاديميروۆيچ پۋتين 2000 -جىلى پرەزيدەنت اتاندى جانە العاشقى كۇننەن-اق ورناعان جاقسى قارىم-قاتىناستىڭ بۇگىندە ناعىز دوستىققا ۇلاسقانىن جاسىرمايمىن. مەن ونىڭ ادامي قاسيەتتەرى جايلى ايتقىم كەلەدى. مۇنى باسقالاردان جاقسىراق بىلەمىن دەپ ەسەپتەيمىن. ول - سوزىندە بەرىك تۇراتىن جان.

نيككولو ماكياۆەللي ءوزىنىڭ «بيلەۋشى» كىتابىندا بيلەۋشىنىڭ ءوزىنىڭ نەمەسە مەملەكەتتىڭ مۇددەسى ءۇشىن ءوز ءسوزىن قايتىپ الۋعا قۇقىعى بار ەكەنى جازىلعان. پۋتين ونداي ەمەس. ول ءاربىر ءسوزىن ويلانىپ ايتادى جانە ورىنداۋ ءتيىمسىز بولىپ قالعان جاعدايدا دا، بەرگەن سوزىنەن ەشقاشان تايعان ەمەس. مۇنداي اداممەن جۇمىس ىستەۋگە بولادى، مۇنداي ادامدى قۇرمەتتەۋگە بولادى»، - دەدى نۇرسۇلتان نازاربايەۆ.

ول ۆلاديمير پۋتيننىڭ رەسەي ءۇشىن قيىن كەزەڭدە پرەزيدەنت بولىپ سايلانعانىن اتاپ ءوتتى.

«رەسەيدەگى ءار ءوڭىردىڭ ءوز بەتىمەن جۇمىس ىستەپ، ورتالىق بيلىكتىڭ السىرەگەن ءساتىن ەسكە الايىق. ءبىز رەسەيمەن كورشىمىز، وڭىرلەردىڭ سالىق تولەۋدى قويعانىن كوردىك، ءارقايسىسى قىزمەت اقىسىن وزدەرى تاعايىنداپ، ەركىنسىدى. كاۆكازدا سوعىس ءجۇرىپ جاتتى، حالىقارالىق جاعداي دا، ىشكى ەكونوميكا دا ناشار جاعدايدا ەدى. قانداي كۇردەلى جاعداي بولسا دا ول (ۆ. پۋتين - رەد. ) وسىنىڭ ءبارىن جونگە كەلتىردى»، - دەدى ن. نازاربايەۆ.

سونىمەن بىرگە، ق ر پرەزيدەنتى رەسەيدىڭ الەمدىك ارەناداعى ورنى ايرىقشا ەكەنىن باسا ايتتى.

«رەسەيدى ەشكىم كوزگە ىلمەدى، ماڭىزدى الەمدىك ماسەلەلەردى شەشۋگە جىبەرمەدى. رەسەيدى ىسىرىپ تاستاۋ مۇمكىن ەمەس. رەسەي - الەمدىك ساياساتتاعى ماڭىزدى فاكتور بولىپ سانالاتىن الىپ يادرولىق-زىمىراندىق ەل. پۋتين رەسەيدى ءتيىستى دەڭگەيگە كوتەردى. سيريا ۇكىمەتىنىڭ وتىنىشىمەن بۇل شيەلەنىسكە قاتىسۋ تۋرالى شەشىم قابىلداۋدىڭ ءوزى باتىلدىق. ءىس جۇزىندە رەسەي سول ەلدە بولعان ەكسترەميزم، تەرروريزم سىندى الەمدىك زۇلىمدىقتاردى جويۋعا اتسالىستى»، - دەپ ءوز ءسوزىن تولىقتىردى ق ر پرەزيدەنتى.

ول اۋقىمدى قاۋىپ-قاتەرلەردىڭ بولعانىن جانە سونداي قادامدى جاساۋ قاجەت بولعانىن اتاپ ءوتتى.

«سونىڭ ناتيجەسىندە بۇل شەشىم تابىستى بولدى. مىنە، پۋتين دەگەنىڭىز وسىنداي ادام»، - دەپ ءوز ءسوزىن تۇيىندەدى نۇرسۇلتان نازاربايەۆ.