اياگوز- قاراعاندى باعىتىنىڭ 528-704 شاقىرىمىندا، اياگوز-قاينار باعىتىنىڭ 0-144 شاقىرىمىندا بارلىق كولىكتەر ءۇشىن جول جابىق. اياگوز قالاسىنىڭ وزىندە سۋ العان ۇيلەردىڭ ناقتى سانى ءالى انىقتالعان جوق.
«بارلىق جاۋاپتى قىزمەت وكىلدەرى اۋدان ورتالىعىندا ءجۇرمىز. ازىرگە زارداپ شەككەن ۇيلەر تۋرالى ناقتى اقپارات ايتۋعا ەرتە. كورشى اۋدانداردان قوسىمشا تەحنيكا مەن جاساقتار كومەككە شىقتى. قازىرگى تاڭدا ادامداردى قاۋىپسىز جەرگە كوشىرۋمەن اۋرەلەنىپ جاتىرمىز» - دەيدى اۋداندىق توتەنشە جاعدايلار قىزمەتىنىڭ وكىلى جانات تاڭىربەرگەن ۇلى.
ال الەۋمەتتىك جەلىگە تاراعان ۆيدەولاردا قالانىڭ جاڭاۋىل اتالاتىن بولىگىندە قارعىن سۋدىڭ دەڭگەيى كوپىرمەن تەڭەسكەنىن حابارلاۋدا. تاعى ءبىر ۆيدەودا قالا ورتاسىنداعى جەر ءۇيدىڭ قۇلاپ قالعانىن ايتىلادى.
كۇرشىم، ۇلان، اياگوز اۋداندارىمەن بىرگە گلۋبوكوە اۋدانىنىڭ دا سۋ جايىلعان ەلدى مەكەندەرىندە توتەنشە جاعداي ماماندارى جۇمىس ىستەۋدە.