ەكى قازاقستاندىق ۆيزاسىز رەجيم ورناعانىنا قاراماستان دۋبايعا جەتە المادى

 استانا. قازاقپارات - ۆيزالارى بولماعاندىقتان، ەكى قازاقستاندىق ازامات دۋبايعا ۇشاتىن رەيسكە جىبەرىلمەدى.

ماسكەۋدەگى دومودەدوۆو اۋەجايىندا دۋبايعا جول تارتقان ەكى قازاقستاندىق ازامات ۆيزانىڭ جوقتىعىنان رەيستەن شەتتەتىلدى. بۇل جاعداي 2018 -جىلدىڭ 10 - ناۋرىزىندا قازاقستان ازاماتتارىنىڭ بىرىككەن اراب امىرلىكتەرى اۋماعىنا كىرۋىنىڭ جاڭا ءتارتىبى كۇشىنە ەنۋىنە قاراماستان ورىن الدى. بولعان جايتتى جولاۋشىلاردىڭ وزدەرى باياندادى.

«ەسىمىم - مالىك، جۇبايىم ەسىمى - ينديرا. ءبىز ساماردان ماسكەۋگە كەلىپ، ماسكەۋدەن دۋبايعا ۇشپاقشى بولدىق. ەكەۋمىزدى دە ۇشاققا جىبەرمەدى. Emirates Airlines اۋەكومپانياسى ءبىزدى رەستەن شەتتەتتى. ۇشۋ ۋاقىتىمىز 10 - ناۋرىز كۇنى ساعات 17.10 دا بولاتىن. ءبىز دۋبايداعى كوشى- قون قىزمەتىنە حابارلاستىق. ولار قازاقستانمەن ۆيزاسىز رەجيم ورناتىلعانى تۋرالى اقپارات جوق ەكەنىن، قازاقستاندىقتار ءۇشىن ۆيزانىڭ ءالى دە قاجەت ەكەنىن ايتتى. جۇيەدە ۆيزاسىز رەجيم ورناتىلعان سوڭعى ەل - ۋكراينا» ، - دەدى جولاۋشى.

كەيىن قازاقستاندىقتار Emirates Airlines تىڭ تاعى ءبىر رەيسىنە وتىرۋعا تىرىستى. ءبىراق ولار دۋباي قازاقستان ازاماتتارىن ۆيزاسىز قابىلدامايتىنىن ايتىپ، رەسمي تۇردە باس تارتتى.

 

Baq.kz