گولوۆكين الۆارەس تۋرالى: ول شىنايى ءجۇزىن كورسەتتى

استانا. قازاقپارات - «كانەلونىڭ» دوپينگ سىناماسىنان تىيىم سالىنعان زاتتىڭ تابىلۋى ادامدار اراسىندا ءتۇرلى پىكىرلەر تۋعىزدى.

بۇعان قاتىستى قازاقستاندىق بوكسشى گەننادي گولوۆكين (37-0-1، 33 ك و) LA Times-قا بەرگەن سۇحباتىندا ءوزىنىڭ كوزقاراسىن ءبىلدىردى، دەپ جازادى «SPORTINFORM» س ا ا.

«مۇنداي جاعداي ونىڭ جەكپە-جەككە شىققىسى كەلمەيتىندىگىن نەمەسە وندا كومانداسىمەن قانداي دا ءبىر پروبلەما بارىن بىلدىرەدى. بۇل سەنىڭ شىنايى ءجۇزىڭدى كورسەتەدى. وسىنداي دەڭگەيدەگى سپورتشى قاتەلىك جىبەرمەۋى كەرەك، ايتپەسە ول جالپى سپورت ءۇشىن كەرى قۇبىلىس بولادى»، - دەدى گەننادي گولوۆكين.

قازاقستاندىق بوكسشى اتلەتيكالىق كوميسسيا بۇل ىسكە ارالاسىپ نەمەسە ونى سپورتتان شەتتەتۋى كەرەك دەپ ەسەپتەيدى.

«ءبارى قاراپايىم بولۋى كەرەك. دوپينگ سىناماسى وڭ نەمەسە تەرىس كورسەتكىش بولۋى ءتيىس. قالعاندارىنىڭ ءمانى جوق. سول ءۇشىن دە ارنايى كوميسسيا جۇمىس ىستەيدى جانە ونىڭ ءتيىستى ءتارتىبى بار. ەگەر ءسىز ءبارى دۇرىس، بۇل قالىپتى دەسەڭىز، بۇل سپورت ءۇشىن قاۋىپتى»، - دەدى بوكسشى.

ەسكە سالا كەتەيىك، گولوۆكين مەن الۆارەستىڭ 5 -مامىردا ەكىنشى جەكپە-جەگى وتەدى.