اقتوبەدەگى الىپ زاۋىتتا جۇمىس ىستەيتىن كرانشىلاردىڭ تەڭ جارتىسى - ايەل

اقتوبە. قازاقپارات - اقتوبە فەرروقورىتپا زاۋىتىندا جۇمىس ىستەيتىن كران ءماشينيسىنىڭ تەڭ جارتىسى - ايەل.

ەر ازاماتتارمەن تەڭ جۇمىس ىستەيتىن نازىك جاندىلار قيىندىقتى تاباندىلىقپەن جەڭىپ كەلەدى، دەپ حابارلايدى قازاقپارات ءتىلشىسى.

اقتوبە فەرروقورىتپا زاۋىتىندا ەر ادامدارمەن بىرگە ايەلدەر دە جۇمىس ىستەيدى. ولاردىڭ كوبى كرانشى ماماندىعىن يگەرگەن. گۇلدانا دۇيسەنعاليەۆا سالماعى 20 توننالىق، بيىكتىگى 12 مەتر بولاتىن كرانعا كۇن سايىن كوتەرىلىپ، جۇكتى ۆاگوندارعا تيەپ، ءتۇسىرىپ بەرەدى.

«بالا كەزىمدە دارىگەر بولۋدى ارماندادىم. بالالىق ارمانىم جۇزەگە اسپاعاندىقتان ءارتۇرلى سالالاردا قىزمەت جاسادىم. 2012-جىلى جۇمىسپەن قامتۋ ورتالىعىنىڭ كومەگىمەن كرانشىلار دايىندايتىن كۋرستى ءبىتىرىپ شىقتىم. سودان اقتوبە فەرروقورىتپا زاۋىتىنىڭ دايىن ءونىم تسەحىنا جۇمىسقا كەلدىم. تاجىريبەم از بولعاندىقتان جۇمىسقا كەلگەندە ءوز ءىسىنىڭ شەبەرى اتانعان تالىمگەر سانىمگۇل جۇماعاليەۆانىڭ قاراۋىندا بولدىم. العاشقى كۇنى كراندى باسقارۋعا قورىقتىم. سەبەبى، تومەندە تۇراتىن ادامداردىڭ ءومىرى بىزگە بايلانىستى، جۇكتى دە ءوز رەتىمەن تيەۋ كەرەك. بالا كەزىمنەن بيىكتىكتەن قورقاتىن ەدىم. بۇل دا قورقىنىشىمدى ۇدەتتى. ءبىراق بىرنەشە كۇن ءتالىم الىپ، ءبارىن ۇيرەندىم. قولىم دا، كوزىم دە ۇيرەندى. قازىرگى كەزدە كرانسىز ءومىرىمدى ەلەستەتە المايمىن. وسى جەردەن زەينەتكە شىققىم كەلەدى»، - دەدى گۇلدانا دۇيسەنعاليەۆا.

كران ءىشى قىستا سۋىق، جازدا ىستىق بولادى. ءبىراق كران باسقاراتىن نازىك جاندىلار جۇمىستىڭ بۇل قيىندىعىنان قاشقان ەمەس.

«ءبىزدىڭ سەحتىڭ وزىندە 31 كران ماشينيسى اۋىسىممەن جۇمىس ىستەيدى. ونىڭ تەڭ جارتىسى - ايەلدەر. وندىرىستەگى جۇمىستىڭ 90 پايىزى كراننىڭ كومەگىمەن اتقارىلادى. كران ماشينيسى كۇندەلىكتى تاپسىرمانى تومەندەگى ءىلۋشى مامانمەن بىرگە اتقارادى. ەكى مامان بىرلەسە نەگىزگى جۇمىستى اتقارادى»، - دەدى دايىن ءونىم سەحىنىڭ اعا ءوندىرىس شەبەرى الەكساندرا ۋربيسەنوۆا.