قازاق تەلەۆيزياسى - قازاق زيالى قاۋىمىنىڭ رۋحاني، مادەني وشاعى بولدى - ەرلان قارين

استانا. قازاقپارات - قازاق تەلەۆيزياسى - قازاق زيالى قاۋىمىنىڭ رۋحاني، مادەني وشاعى بولدى. بۇل تۋرالى «قازاقستان» ر ت ر ك» ا ق-نىڭ باسقارما ءتوراعاسى ەرلان قارين فەيسبۋكتەگى پاراقشاسىندا جازدى، دەپ حابارلايدى قازاقپارات.

ەل تۇرعىندارىن قازاق تەلەۆيزياسىنىڭ 60 جىلدىعىمەن قۇتتىقتاعان ە. قارين وسىدان 60 جىل بۇرىن قازاق تەلەۆيزياسىنىڭ نەگىزى قالانىپ، العاشقى وتاندىق حابارلار ەفيرگە شىعا باستاعاندىعىن ايتادى.

«1958 -جىلى 8 -ناۋرىزدا العاشقى رەت ەفير سىناق رەتىندە تاراتىلدى، ال 16 -ناۋرىزدا ەفير تۇراقتى تۇردە تاراتىلا باستادى. قازاق تەلەۆيزياسىنىڭ 60 جىلدىق دامۋ تاريحىندا حالقىمىزدىڭ رۋحاني، مادەني، قوعامدىق قۇندىلىقتارىنىڭ دامۋىنا، ۇلتتىق سانا-سەزىمنىڭ قالىپتاسۋىنا قوسقان ۇلەسى ولشەۋسىز، ماڭىزى ەرەكشە. ءار قازاقتىڭ تورىنەن ورىن العان كوگىلدىر ەكراننان سان ءتۇرلى قۇندى دۇنيەلەر جارىق كورىپ، قالىڭ كورەرمەنگە جول تارتتى»، - دەپ جازدى ول.

سونداي-اق ە. قارين قازاق تەلەۆيزياسى - قازاق زيالى قاۋىمىنىڭ رۋحاني، مادەني وشاعى بولعاندىعىن ايتادى. وسى قارا شاڭىراقتا ءار جىلدارى ەڭبەك ەتكەن زيالى قاۋىم كوپتەگەن جاس مامانداردى تاربيەلەپ، بولاشاققا باعىت بەرىپ، جول سىلتەدى، وتاندىق تەلەۆيزيا مەكتەبىنىڭ قالىپتاسۋىنا اتسالىستى. ۇلتتىق ارنا ءار كەزەڭدە زامان اعىمىنا ساي وزگەرىپ، بولاشاققا قانات قاعىپ كەلەدى.

«ءبىز ادەتتەگىدەي، «التىن قوردا» ساقتالعان تەلەباعدارلامالار مەن تەلەۆيزيا ارداگەرلەرى جايلى باعدارلامالاردى كورسەتۋدى جالعاستىرامىز. وندا بەلگىلى كۇيشى جانە تەرمەشى، قازاق تەلەديدارىنىڭ رەجيسسەرى مۇرات كاريمۋللين جايلى «جارقىن بەينە»، قازاقتىڭ العاشقى ديكتورى زۇلقيا جۇماتوۆا جايلى «كەلبەت» دەگەن حابارلار كورسەتىلدى. 10 -ناۋرىزدا، 08:20-دا جانە 11 -ناۋرىز، 11:25-تە قازاق تەلەۆيزياسىنىڭ ارداگەرلەرى قاتىسقان «دارا جول»، 10 ناۋرىز كۇنى 16:35-تە قازاق تەلەۆيزياسىنىڭ 60 جىلدىعىنا ارنالعان ارنايى حابار، ال 11 -ناۋرىزدا، 17:25-تە بەلگىلى جۋرناليست بەيبىت قۇسانبەكتىڭ «ءومىر- وزەن» باعدارلامالارىن تاماشالاي الاسىزدار! كەشەگى كۇن - بۇگىنگى تاريح دەمەكشى، كەزىندە ەل مۇددەسى ءۇشىن اتسالىسقان ارداگەرلەرىمىزدى ۇمىتپاۋ - ءبىزدىڭ پارىزىمىز!»، - دەيدى باسقارما ءتوراعاسى.

ال، 16 -ناۋرىزدا «Qazaqstan» ۇلتتىق ارناسى قازاق تەلەۆيزياسىنىڭ 60 جىلدىعىنا وراي، تەلەۆيزيا ارداگەرلەرىنە ارناپ سالتاناتتى جيىن وتكىزبەك.

«الداعى ۋاقىتتا ۇلتتىق ارنانى بۇدان دا بيىك اسۋلار كۇتىپ تۇر. «Qazaqstan» ۇجىمى تالاي بەلەستەردى باعىندىرىپ، ۇلكەن جەتىستىكتەرگە جەتەتىنىنە سەنىمدىمىز! بارشاڭىزدى قازاق تەلەۆيزياسىنىڭ 60 جىلدىق مەرەيتويمەن قۇتتىقتايمىز!»، - دەلىنگەن ە. قاريننىڭ جازباسىندا.