«بۇكىل الەم ايەلدىڭ اق تىلەگىنىڭ ارقاسىندا شاتتىق شۋاعىنا بولەنىپ تۇر. انا مەن بالا ماسەلەسى ەشقاشان ءبىزدىڭ نازارىمىزدان تىس قالعان ەمەس. مەن الدىڭعى كۇنى وزدەرىڭىز ەستىپ بىلگەندەي حالىققا ۇندەۋ جولداپ، بەس جاڭا الەۋمەتتىك باستاما ۇسىندىم. ءاربىر وتباسىنا، جاستارعا، سونىمەن بىرگە ايەلدەرگە دە بۇل باستامالاردىڭ بارلىعىنىڭ شاراپاتى تيەدى. سەبەبى، وندا ايتىلعان ماسەلەلەردىڭ ءبارى ايەلدەرگە تىكەلەي قاتىستى. اتاپ ايتساق، باسپانانى ءاربىر وتباسىعا قولجەتىمدى ەتۋ، ءبىلىم گرانتتارىن كۇرت كوبەيتۋ، شاعىن نەسيەلەردى بەرىپ، سونىمەن بىرگە كوپتەگەن الەۋمەتتىك ماسەلەلەر قامتىلعانىن بىلەسىزدەر. ياعني، پرەزيدەنتتىڭ بەس الەۋمەتتىك باستاماسى اتتى باعدارلاما ەڭ الدىمەن سىزدەرگە ارنالعان، قۇرمەتتى حانىمدار» ، - دەدى ەلباسى استاناداعى «قازاقستان» كونسەرت زالىندا ءوتىپ جاتقان «كوكتەم شۋاعى» اتتى كونسەرتتە.
نۇرسۇلتان نازاربايەۆتىڭ ايتۋىنشا، ايەلدىڭ جاعدايى جاقسى بولسا، الەۋمەتتىڭ جاعدايى دا جاقسى بولادى.
«سوندىقتان، مەن ول باستامالاردى ادەيى كوكتەمنىڭ ەڭ شۋاقتى مەرەكەسى - حالىقارالىق ايەلدەر كۇنى قارساڭىندا جاريالادىم. ارداقتى ارۋلار، ايەلدىڭ جاعدايى جاقسى بولسا، الەۋمەتتىڭ جاعدايى دا جاقسى بولادى. بارلىق شارۋانى قينالماي اتقارىپ، ىسكەر ايەلدەردىڭ ەرلىگى دە، ورلىگى دە وزىنە جاراسىپ تۇرادى. ارۋلاردىڭ اقىل- ويىنىڭ كۇش- جىگەرى ءوز شاڭىراعىن دا، قوعامدى دا ورگە سۇيرەي الادى. «ايەلدەرسىز كۇن كورۋگە بولادى، ءبىراق كورگەن كۇنىڭ كۇن بولمايدى» دەگەن قادىر اقىن. سىزدەر ءاردايىم ەر- ازاماتتارعا قولعانات بولىپ، ولاردى ۇنەمى قولداپ كەلەسىزدەر» ، - دەدى پرەزيدەنت.
مەملەكەت باسشىسى قازاقتىڭ «ەركەكتىڭ قايلامەن بۇزا الماعانىن، ايەلدەر ايلامەنەن بۇزا الادى» دەگەن ءسوزىن كەلتىردى.
«سوندىقتان، تاۋەلسىز مەملەكەتىمىزدە سىزدەردىڭ كومەكتەرىڭىز ءارقاشان قاجەت دەپ ويلايمىن. «ايەلدەردى سويلەتۋدىڭ امالى كوپ، ءبىراق سويلەتپەۋدىڭ ەشقانداي ءتاسىلى جوق» دەيدى قازاق. ءبىزدىڭ قوعامدا سىزدەر ءاردايىم ەركىن پىكىر ايتىپ، ەل ىسىنە ەتەنە ارالاسۋعا تيىسسىزدەر. جاندارىڭىز وتە نازىك بولعانىمەن، قايراتتارىڭىز ەر- ازاماتتاردان ەشقاشان كەم تۇسكەن ەمەس. وسىعان وراي، جۇرت «ايەل قالاسا، ەركەكتەن ءبارىن الادى، ءتىپتى فاميلياسىن دا الادى» دەيدى. قازىرگى كوزى اشىق، كوكىرەگى وياۋ ءاربىر قىز- كەلىنشەك، اياۋلى جار، اسىل انا بىلىكتى مامان بولۋدى قالايدى. بۇل وتە دۇرىس» ، - دەپ ءتۇيدى مەملەكەت باسشىسى.
اۆتور: ايان بەكەن ۇلى