دانيار ەلەۋسىنوۆتىڭ ا ق ش- تاعى باپكەرى بەلگىلى بولدى

استانا. قازاقپارات - بوكستان وليمپيادا چەمپيونى دانيار ەلەۋسىنوۆتى امەريكادا اكەسى مارات ەلەۋسىنوۆ جاتتىقتىراتىن بولدى، دەپ جازادى Sports.kz بوكسشىمەن كەلىسىمشارت جاساسقان Boxing Star مەنەدجەرلىك كومپانياسىنىڭ اتقارۋشى ديرەكتورى زيا اليەۆكە سىلتەمە جاساپ.

«دانيار ەلەۋسىنوۆتى ا ق ش-تا اكەسى باپتايدى. باپكەردىڭ كومەكشىسى دە بولادى، ونىڭ ەسىمىن جۋىق كۇندەردە جاريالايمىز»، - دەيدى ز. اليەۆ.

ونىڭ ايتۋىنشا، دانيار نيۋ-يوركتە اكەسىمەن بىرگە تۇراتىن بولادى. قازىر جاتتىعۋ زالى، مارات ەلەۋسىنوۆكە كومەكشى باپكەردىڭ ولارعا قوسىلۋى جونىندە كەلىسسوزدەر وتۋدە. ولار نيۋ-دجەرسي نەمەسە برۋكلينگە تۇراقتاۋى مۇمكىن. ال قازىر بوكسشىعا ۆيزا رەسىمدەۋ جۇمىستارى ءجۇرىپ جاتىر.

ەسكە سالا كەتەيىك، بۇدان بۇرىن قازاقستاندىق بىلعارى قولعاپ شەبەرىنىڭ اكەسى كاسىپقوي بوكسقا اۋىسقان ۇلىنىڭ «تالابىن قايتارعىسى كەلمەيتىنىن» ايتقان بولاتىن.