استانادا ناۋرىز مەيرامى قالاي تويلانادى؟
ءداستۇر بويىنشا باستى شارالار 21-22- ناۋرىزدا قالانىڭ اشىق الاڭدارىندا ساعات تاڭعى 10.00 دەن كەشكى 18.00 گە دەيىن وتەدى، دەپ حابارلايدى استانا قالاسىنىڭ مادەنيەت، مۇراعاتتار جانە قۇجاتتاما باسقارماسى.
بيىل حالىقتىق سەرۋەن بۇرىنعىداي «حان شاتىر» س و س و الاڭىندا ەمەس، «ەكسپو» كورمەسى اۋماعىندا ۇيىمداستىرىلادى. سونىمەن قاتار مەرەكەلىك شارالاردى «قازاق ەلى» الاڭىندا، قالالىق الاڭدا، «ستۋدەنتتىك» ساياباقتا جانە قالانىڭ تۇرعىن الابتارىندا دا تاماشالاۋعا بولادى.
21-22- ناۋرىزدا «استانا ەكسپو» حالىقارالىق مامانداندىرىلعان كورمەسى اۋماعىندا كيىز ۇيلەر تىگىلىپ، ەتنواۋىل اشىلادى، جينالعان قاۋىمنىڭ نازارىنا مەرەكەلىك كونسەرت ۇسىنىلادى. استانا قالاسىنىڭ تەاترلارىنىڭ ارتيستەرى مەن ەتنومادەني بىرلەستىكتەردىڭ وكىلدەرى ءاربىر كيىز ءۇيدىڭ جانىندا قازاق حالقىنىڭ سالت-داستۇرلەرىن كورسەتەدى. بۇدان باسقا، فۋد-كورت ايماعى جاسالادى. وندا پالاۋ، ناۋرىز كوجە مەن باۋىرساق دايىنداۋعا ارنالعان قازاندار تۇرادى.
ساۋدا ورىندارىندا شىعىس اسپازدىعىنان ىستىق تاعامدار ساتىلادى. سونداي-اق ساندىك-قولدانبالى ونەر بۇيىمدارىن ساتۋ-كورمەسى ۇيىمداستىرىلادى.
ەتنواۋىل ايماعىندا حالىق اراسىندا قازاق كۇرەس، ارقان تارتىس، گىر كوتەرۋ، قوي كوتەرۋ سياقتى ۇلتتىق ويىندار ويناتىلادى.
مۇنىمەن قوسا، ناۋرىز مەيرامىن مەرەكەلەۋ اياسىندا ەتنواۋىل اۋماعىندا يت جارىسى، تازى مەن توبەتتەر كورمەسى وتەدى.
مەرەكە كۇندەرى شارالار قالانىڭ «قازاق ەلى» مونۋمەنتىنىڭ الدىنداعى الاڭدا، قالالىق الاڭدا، «ستۋدەنتتىك» ساياباقتا، سونداي-اق كۇيگەنجار، پرومىشلەننىي، ينتەرناتسيونالنىي، ميچۋرينو، جەلەزنودوروجنىي، پريگورودنىي، ۇركەر، كوكتال، ءوندىرىس تۇرعىن الابتارىندا ۇيىمداستىرىلادى. الاڭداردا كوپشىلىك نازارىنا كونسەرتتىك باعدارلامالار ۇسىنىلادى، 40 تان استام كيىز ءۇي تىگىلەدى، التىباقاندار ورناتىلادى. ساۋدا-ساتتىق جۇرگىزىلىپ، ۇلتتىق سپورت تۇرلەرىنەن جارىستار وتەدى.
ەلوردا تۇرعىندارى مەن قوناقتارىن ۇلىستىڭ ۇلى كۇنى ءاز ناۋرىز مەيرامىن قارسى الۋعا شاقىرامىز.
سونىمەن قاتار، استانانىڭ بارلىق مادەنيەت مەكەمەلەرىندە ناۋرىز مەيرامىنا ارنالعان شارالار ۇيىمداستىرىلادى.
21- ناۋرىزدا كونگرەسس- ورتالىقتا قازاقستاندىق «جاڭارعان جەر، باق قونعان نۇرلى ەل» ميۋزيكلى كورسەتىلەدى. شاراعا جاس تالانتتار، وپەرا، بالەت، تەاترى سىندى ساحنا ونەرىندەگى جاڭا تۇلعالار تارتىلعان. ميۋزيكل بارىسىندا سيمفونيالىق وركەستر الەمدىك كلاسسيكالىق مۋزىكا، قازاقستاندىق كومپوزيتورلاردىڭ بەلگىلى كومپوزيتسيالارىن ورىندايدى. وسى كۇنى «استانا» كونسەرت زالىندا «اۋىلىم -ءانىم» اتتى كونسەرت وتەدى.
20- ناۋرىزدا «جاستار» سارايىنىڭ قوناقتارى «جەنشينا- ۆەسنا» كونسەرتتىك باعدارلاماسىن تاماشالايدى.
16- ناۋرىزدا «الجير» مۇراجايىندا بالالار ءۇيىنىڭ، مامانداندىرىلعان ينتەرناتتاردىڭ تاربيەلەنۋشىلەرىنە ارناپ «دوبرو پوجالوۆات، ناۋرىز!» اتتى مەرەكەلىك تانىمدىق- ويىن-ساۋىقتىق باعدارلاما ۇيىمداستىرىلادى. سونداي-اق «ماڭگىلىك ەل» قاقپاسىندا ناۋرىز مەيرامىنا وراي ەلوردالىق جاس سۋرەتشىلەر مەن فوتوسۋرەتشىلەردىڭ كورمەسى وتەدى، ال تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ جونىندەگى ديرەكسيا «ناۋرىز - بەيبىتشىلىك جانە دوستىق مەرەكەسى» اتتى شارا وتكىزەدى. ناۋرىزدىڭ 19 ى مەن 23 ءى ارالىعىندا ساكەن سەيفۋللين مۋزەيىندە «استاناعا قوش كەلدىڭ - ءاز ناۋرىز» ەكسپوزيتسياسى جۇمىس ىستەيدى.
مەرەكە كۇندەرى ەلوردانىڭ بارلىق كىتاپحانالارىندا كىتاپ ەكسپوزيتسيالارى، ۇلتتىق سالت-داستۇرمەن تانىستىراتىن تەاترلاندىرىلعان كەشتەر، بيبليوشوۋ، تاقىرىپتىق ۆيكتورينالار، ەتنوگرافيالىق كورمەلەر كوپشىلىك نازارىنا ۇسىنىلادى.
شارالاردىڭ تولىق كەستەسى www.madeniet.astana.kz سايتىندا جاريالانعان.