وزبەكستاندا اقتوبە وبلىسىنىڭ كۇندەرى وتەدى
اقتوبە تۇرعىندارى كورشى ەلدەردەگى قالا، وبلىس ورتالىقتارىنا ءجيى شىعىپ، اۋىل شارۋاشىلىعى جارمەڭكەسىن ۇيىمداستىرادى. ماسەلەن، رەسەيدىڭ ورىنبور، ورسك قالالارىنا باردى. بيىل وزبەكستان، ونىڭ ىشىندە قاراقالپاقستاننىڭ نوكىس قالاسىنا جول ءتۇسىپ تۇر. اقتوبەلىك كاسىپكەرلەر ءوز ونىمدەرىن تانىستىرىپ، ءوزارا ىنتىماقتاستىق كەلىسىمشارتتارىنا قول قويادى دەپ جوسپارلانعان.
«بيىل وبلىس اكىمى بەردىبەك ساپاربايەۆتىڭ تاپسىرماسىمەن وزبەكستان، ونىڭ ىشىندە قاراقالپاقستان رەسپۋبليكاسىنىڭ نوكىس قالاسىنا بارامىز. وندا اۋىل شارۋاشىلىعى جارمەڭكەسى ۇيىمداستىرىلادى. ونەر ادامدارى ۇلتتىق ءان مەن بيدەن كونسەرت قويادى. ال كاسىپكەرلەر تاۋار اينالىمىن ارتتىرۋ ءۇشىن سەرىكتەس ىزدەيدى. ەكى ەل اراسىنداعى قارىم-قاتىناستى نىعايتۋعا ارنالعان شارا كۇز ايلارىنا جوسپارلاندى»، - دەدى اقتوبە وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەنباي.
ايتا كەتەيىك، اقتوبەدە ءوڭىرارالىق كووپەراتسيانى دامىتۋ باعىتىندا جۇمىس ءجۇرىپ جاتىر. بۇعان دەيىن حابارلاعانىمىزداي، وتكەن جىلى اقتوبە وبلىسى مەن وزگە وڭىرلەر اراسىنداعى تاۋار اينالىمى 16,4 ميلليارد تەڭگەگە جەتتى.