ستۋدەنتتەر جاتاقحانالاردى وزدەرى سالادى
بۇل تۋرالى بۇگىن ق ر ءدىن ىستەرى جانە ازاماتتىق قوعام ۆيتسە-ءمينيسترى ابزال نۇكەنوۆ ايتتى، دەپ حابارلايدى قازاقپارات.
«ەلباسىنىڭ 5 الەۋمەتتىك باستاماسىنا بايلانىستى بۇگىن ءبىرقاتار كەزدەسۋ وتكىزدىك. تۇسكە دەيىن ساراپشىلارمەن كەزدەسىپ، اقىلداستىق. سەبەبى مەملەكەت باسشىسى بۇل باستامالاردى جۇزەگە اسىرۋ بارىسىندا حالىقپەن كەڭ تالقىلاۋدى تاپسىرعان بولاتىن. تالقىلاۋ بارىسىندا بۇل ۇردىسكە جاستاردى كەڭىنەن تارتۋ ماسەلەسىنە ايرىقشا نازار اۋداردىق. ويتكەنى، جاتاقحانالاردى جاستاردىڭ وزدەرى-اق سالا الادى. سول ارقىلى ءبىر جاعىنان جاستاردى جۇمىسپەن قامتىساق، ەكىنشى جاعىنان جاتاقحانالاردى سالۋ بارىسىندا جاستارمەن اقىلداسا وتىرىپ، ونى بارىنشا قولايلى جاسار ەدىك. بۇعان قوسا، جاستار تابىس تا تابادى»، - دەدى ۆيتسە-مينيستر س. سەيفۋللين اتىنداعى اگروتەحنيكالىق ۋنيۆەرسيتەتتە وتكەن قازاقستان جاستارى فورۋمى بارىسىندا.
ونىڭ ايتۋىنشا، قازىر ەلىمىزدىڭ ءاربىر ايماعىندا «جاسىل ەل» جاساقتارى بار. ماسەلەن، بىلتىر اتالعان ۇيىمنىڭ 24 مىڭنان استام جاسى جۇمىس ىستەدى. مۇنان بولەك، كوپتەگەن ايماقتاردا قۇرىلىس وتريادتارى جاساقتالعان.
«ولاردىڭ بارلىعى دا جۇمىس ىستەۋگە دايىن دەپ ويلايمىن. سوندىقتان ول جاستاردى جۇمىسقا تارتقاننان ەشىم ۇتىلمايدى. قايتا جاستاردىڭ وزدەرى ۇتادى. وزدەرى تۇراتىن بولعاننان كەيىن جاتاقحانالار دا ساپالى سالىنادى»، - دەدى ۆيتسە-مينيستر.
سونىمەن قاتار ول ساراپشىلار كەڭەسى بارىسىندا ءبىلىم گرانتتارىن جۇمىسشى ماماندىقتارى تاپشى ايماقتارعا كوبىرەك ءبولۋ جايىندا دا ۇسىنىستار بولعانىن اتاپ ءوتتى.
«ءبىز بۇل ۇسىنىستاردى جيناقتاپ، ءتيىستى مەملەكەتتىك ورگاندارعا، جەرگىلىكتى اكىمشىلىكتەرگە تاراتامىز. تاعى ءبىر ماڭىزدى ماسەلە كەشە ەلباسى بۇل جۇمىستارعا مونيتورينگ جاساۋعا «نۇر وتان» پارتياسىن تارتۋ كەرەك دەپ ايتتى. وسى جۇمىستارعا جاستاردى، جاستار ۇيىمدارىن كەڭىنەن تارتساق، ناتيجەسى وڭ بولاتىندىعىنا سەنىمدىمىن»، - دەدى ابزال نۇركەنوۆ.
اۆتور: مارلان جيەمباي