قازاقستانداعى ءاربىر ەكىنشى ستۋدەنت مەملەكەت ەسەبىنەن ءبىلىم الادى - دانات جۋمين
پارتيا وكىلى ءوز سوزىندە بەس الەۋمەتتىك باستامانىڭ باسىم بولىگى جاستارعا باعىتتالعانىن جانە جوعارى ءبىلىم مەن جاتاقحانانىڭ سۋپەرقولجەتىمدى بولاتىنىن اتاپ ءوتتى.
«پرەزيدەنت قازىرگى 54 مىڭ ءبىلىم گرانتىنا تاعى 20 مىڭ گرانتتىڭ قوسىلاتىنىن حابارلادى. وتكەن جىلى قازاقستان مەكتەپتەرىن 136 مىڭ بالا ءبىتىرىپ شىققان. دەمەك، 74 مىڭ ءبىلىم گرانتىمەن قازاقستانداعى ءاربىر ەكىنشى ستۋدەنت جوعارى ءبىلىمدى تەگىن الا الادى. جوعارى ءبىلىم جاي عانا قولجەتىمدى ەمەس، سۋپەرقولجەتىمدى بولادى. سەبەبى، تۇلەكتەردىڭ ءبىر بولىگى شەتەلگە كەتەدى، كوللەدجگە تۇسەدى نەمەسە اسكەرگە كەتەدى. بۇل تۇرعىدا، ارينە جاستارعا ۇلكەن مۇمكىندىك اشىلعالى تۇر»، - دەدى دانات جۋمين «جاستار» عىلىمي- زەرتتەۋ ورتالىعىندا ەلباسىنىڭ بەس الەۋمەتتىك باستاماسىن تالقىلاۋعا ارنالعان ساراپشىلار كەزدەسۋىندە.
سونىمەن بىرگە، د. جۋميننىڭ ايتۋىنشا، قوسىمشا بولىنەتىن 20 مىڭ ءبىلىم گرانتتارىنىڭ قاي ج و و- لارعا بەرىلەتىنىنە باسا ءمان بەرۋ قاجەت.
«قوسىمشا ءبىلىم گرانتتارى قاي وڭىرگە، قاي ج و و- عا بەرىلەدى دەگەن سۇراققا كەشە مينيستر «مەكتەپ تۇلەگى قاي وقۋ ورنىن تاڭداسا، گرانت سوندا بەرىلەدى» دەپ جاۋاپ بەردى. مۇنىڭ دۇرىس الدە بۇرىس ەكەنىن بىلمەيمىن. ماسەلەن، بىزدە جاستار مەن ەڭبەك كۇشىن مامان قات وڭىرلەرگە كوشىرەتىن «سەرپىن» باعدارلاماسى بار. ەلباسى باستاماسىمەن بولىنەتىن قوسىمشا گرانتتاردى دا جاستارعا قاجەتتىلىك تۋىنداپ وتىرعان ايماقتارعا ءبولۋ قاجەت ەسەپتەيمىن. ارينە، جاتاقحاناعا دا سۇرانىس استانا، الماتى قالالارىندا جوعارى. سەبەبى مۇندا پاتەراقى قىمبات، ادام كوپ. ءبىراق، ءبىز جاستاردىڭ قاي جەرگە كوبىرەك بارعانىن قالاساق، سول جەردىڭ جاعدايىن جاقسارتۋىمىز قاجەت. سەبەبى بۇل - ۇلكەن اقشا جانە ءدال وسى ۇلكەن قاراجاتتىڭ باستى ساياسي ماقساتتارىمىزعا جۇمسالۋى ماڭىزدى»، - دەپ ءوز ءسوزىن تۇيىندەدى دانات جۋمين.
ەسكە سالا كەتسەك، پارلامەنت پالاتالارىنىڭ بىرلەسكەن وتىرىسىندا ق ر پرەزيدەنتى نۇرسۇلتان نازاربايەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن جاريا ەتتى. وسى ورايدا ءۇشىنشى باستاما جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋعا ارنالدى.
«2022 -جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن. بۇل الداعى جىلداردا وسە تۇسەتىن سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەدى»، - دەپ اتاپ ءوتتى مەملەكەت باسشىسى.
اۆتور: ايجان سەرىكجان قىزى