نۇرسۇلتان نازاربايەۆ: ەل بىرلىگى - ەڭ ءبىرىنشى قازاقتىڭ وزىنە كەرەك

استانا. قازاقپارات - جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن بىرلىك پەن ىنتىماق الدىمەن ەلىمىزگە، قازاققا كەرەك.

بۇگىن ق ر پارلامەنتى پالاتالارىنىڭ بىرلەسكەن وتىرىسىندا ق ر پرەزيدەنتى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات.

توقتالا كەتەتىن جايت، بىرلەسكەن وتىرىستا پرەزيدەنت ءوزىنىڭ «بەس الەۋمەتتىك باستاماسىن» جاريا ەتكەن بولاتىن.

«بۇگىنگى باستامالار ەلىمىز تۇتاس، قوعامىمىز تۇراقتى بولعاندا عانا تابىستى جۇزەگە اسادى. وتكەن 26 جىل تاۋەلسىزدىك ىشىندە ءبىز وسى قاعيدانى ۇستانعاندىقتان عانا بەلەستەردى ەڭسەردىك. ال ەل بىرلىگى - ەڭ ءبىرىنشى قازاقتىڭ بىرلىگى ەكەنىن ايتىپ كەلەمىن. جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن بىرلىك پەن ىنتىماق الدىمەن ەلىمىزگە، قازاققا كەرەك»، - دەدى مەملەكەت باسشىسى.

بۇدان بولەك، پرەزيدەنت تاريحتىڭ ءوزى دالەلدەگەن اقيقاتتى مىسالعا كەلتىرىپ، «حالقىمىز بىرلىكتە بولسا - كۇشەيگەنىن، بىرلىگى قاشسا - السىرەگەنىن» دە ەسكە سالدى.

«قاسقا جولدى قاسىم حان ءوز زامانىندا جۇرتىن جۇدىرىقتاي جۇمىلدىرا بىلگەنىنىڭ ارقاسىندا قازىرگى قازاق جەرىنىڭ نەگىزگى اۋماعىن بىرىكتىردى. «ەل بىرلىگى ەل تەڭدىگى» دەگەن سول كەزدەن قالعان ەدى. «قازاق ورداسىنىڭ ليكۋرگى» ءاز تاۋكە ەلىن تاتۋلىققا ۇيىتا بىلگەندىكتەن قوي ۇستىنە بوزتورعاي جۇمىرتقالاعان زامان ورناتتى. «بايلىق بايلىق ەمەس - بىرلىك بايلىق» دەگەن سول زاماننان قالدى. ەل باسىنا كۇن تۋعان كەزدە بارشا قازاق ابىلاي حاننىڭ اق تۋىنىڭ استىنا جينالعان سوڭ عانا جەرىن جاۋدان تازارتا الدى. «بىرىككەن ءجۇز بىتىراڭقى مىڭدى الادى» دەگەن قاعيدا سول كەزدەگى بابالارىمىزدان قالدى. قازاقتىڭ وسىناۋ ءۇش حانى - ەل تاريحىنداعى ءۇش اسقار تاۋ، ال ولاردى اسقاقتاتقان - ەل بىرلىگى. ەل مەن ەلباسى بىرگە بولعان كەزدە عانا بارلىق جەڭىسكە جەتەمىز، الىنبايتىن قامال بولمايدى. التىباقان الاۋىزدىقتىڭ كەسىرىنەن ەلىمىز اڭىراپ، جەرىمىز قاڭىراپ قالعان كەزدەردى تاريحتان جاقسى بىلەمىز»، - دەدى ن. نازاربايەۆ.

سونىمەن قاتار، مەملەكەت باسشىسى تاريحتىڭ اشى ساباعىن ەسكە سالىپ، وتكەنگە قاراپ ەرتەڭدى تۇزەۋ قاجەتتىگىن اتاپ ءوتتى. «وتكەننىڭ ونەگەسى - بۇگىنگى كۇننىڭ باعا جەتپەس بايلىعى. وسىنى جادىندا تۇتىپ، تاريحتان تاعىلىم الا بىلگەن حالقىمىز تاۋەلسىزدىك داۋىرىندە تاتۋلىق پەن بىرلىكتىڭ، تىنىشتىق پەن تۇراقتىلىقتىڭ ارقاسىندا تالاي تابىستارعا كەنەلۋدە»، - دەدى ەلباسى.