اكەلەر، بالالارىڭىزبەن ءجيى سويلەسىپ، ولار ءۇشىن ءاردايىم ۋاقىت تابۋعا تىرىسىڭىز
پسيحولوگتار مىناداي زەرتتەۋ جۇرگىزدى: اتا-انالارعا بالانىڭ قاسىنا جازۋ قۇرىلعىسىن قويىپ، ەكى اتا-انا ۇيدە بولعان كەزدە عانا قوسۋدى تاپسىردى. بۇل جازبالار انالار ۇيىندە - بالا دۇنيەگە كەلگەن سوڭ، كەيىنىرەك بالاعا 1 جاس 7 اي بولعان كەزدە جاسالعان بولاتىن.
قورىتىندىسى تاڭ قالارلىق ناتيجە كورسەتتى - انالارىمىز بالالارىمەن اكەلەرىنە قاراعاندا ءۇش ەسە كوپ سويلەسەتىن، سونداي-اق بالالار دا اكەسىنەن گورى اناسىمەن ديالوگقا تۇسەتىن بولىپ شىقتى. سونىمەن قاتار انالار ۇلعا قاراعاندا قىز بالامەن كوبىرەك اڭگىمە-دۇكەن قۇرادى ەكەن.
ءبىز، ايەلدەر قاۋىمى، بارىنشا اشىق جانە الەۋمەتتىك-بەلسەندىلىك تانىتۋعا بارىنشا «باعدارلامالانعانبىز».
قىز بالالار ۇلدارعا قاراعاندا تەز قارىم- قاتىناس جاساۋعا بەيىم كەلەدى، ءدال وسى سەبەپتى اناسى ۇلىنا قاراعاندا قىزىمەن كوپ اڭگىمەلەسەدى. ويتكەنى جاۋاپ رەتىندە كوپ جاعدايدا ءتىل قاتاتىن بالامەن سويلەسۋ اناعۇرلىم قىزىعىراق. ءسىز بىلەر ماڭىزدى نارسە - بالا نەعۇرلىم كوپ ءسوز ەستىسە، سوعۇرلىم ەرتە سويلەيدى، سوزدىك قورى مول بولادى، وقۋدى دا تەز مەڭگەرەدى. مۇنىڭ ءبارى كەلەشەكتە بالانىڭ مۇمكىندىگىن جوعارىلاتادى جانە تابىستى بولۋىنا سەبەپشى بولادى.
وكىنىشكە وراي، از قامتىلعان وتباسىلاردان شىققان بالالارمەن اڭگىمە وتە از جۇرگىزىلەدى. الايدا الەۋمەتتىك جاعدايى تومەن، ناشار وتباسىدان شىققان بالالار تۇرمىسى ءتاۋىر تۇراتىن قۇرداستارىنا قاراعاندا 30 ميلليون ءسوز از ەستيتىندىگى شىندىق بولىپ قالا بەرەدى. ءبىراق بۇل زەرتتەۋ باي مەن كەدەي تۋرالى ەمەس. بۇل ءوز بالالارى ءۇشىن ىستەۋگە قولىنان كەلەتىن جانە ىستەۋگە ءتيىستى نارسەلەر جانە اتا-انالار تۋرالى. اسىرەسە بۇل اكەلەرگە تىكەلەي قاتىستى!
اكەلەر، وزدەرىڭىزدىڭ كىشكەنتايلارىڭىزبەن كوبىرەك سويلەسىڭىزدەر! بالانى اناسىنىڭ جانىندا قالدىرۋ ويىنا كوندىگە بەرمەڭىزدەر. بالامەن بارلىق نارسە تۋرالى اڭگىمەلەسىڭىز: ءوز جوسپارلارىڭىزبەن ءبولىسىڭىز، ءسىزدىڭ بۇگىنگى كۇنىڭىزدىڭ قالاي وتكەندىگى تۋرالى ايتىپ، ءوزىڭىزدىڭ كورگەن- بىلگەن ارەكەتىڭىزدەن حاباردار ەتىپ وتىرىڭىز. بىرگە ويناڭىز! قالجىڭداسىڭىز! سىزگە بالامەن اناسى سەكىلدى سويلەسۋدىڭ قاجەتى شامالى! ءسىز ءوز ەركىڭىزشە جاساڭىز!
اكەنىڭ بالاسىنا كوپ جاعدايدا «نە؟» «قايدا؟» سۇراقتارىن قويۋى بالانىڭ ويلاۋ جۇيەسىنىڭ دامۋىنا جانە سوزدىك قورىنىڭ مولايۋىنا كومەكتەسەدى ەكەن. بالامەن بىرگە ۋاقىت وتكىزۋ ارقىلى ءسىز ونىڭ سويلەۋ جۇيەسى دامۋىنىڭ نەگىزىن قۇرايتىن سوزدىك قورىن كوبەيتەسىز.
اسىرەسە بۇل قىزدارعا قاراعاندا از سويلەيتىن، سويلەۋ مەن وقۋدى كەش ۇيرەنەتىن ۇلدار ءۇشىن وتە ماڭىزدى. اكە ءوز ۇلىمەن كوبىرەك سويلەسۋ ارقىلى ءدال وسى «گەندەرلىك» ايىرماشىلىقتى جويۋعا سەپتىگىن تيگىزەدى.
ەستە ساقتاڭىز: بەسىك تەربەتەتىن قول الەمدى دە تەربەتەدى.
دەرەككوز: http://www.vospitaj.com