بۇركىتشىلەر مەرەكەسىنە الەمگە ايگىلى ايشولپان قاتىستى

استانا. قازاقپارات - موڭعوليا استاناسى ۇلانباتىر قالاسىنىڭ ماڭىندا ورنالاسقان «چينگيسين حۋرەە» تۋريستىك بازاسىندا جىل سايىنعى «كوكتەمگى التىن قىران» فەستيۆالى وتۋدە، دەپ حابارلايدى «قازاقپارات» ح ا ا مونسامە-گە سىلتەمە جاساپ.

ايتا كەتكەن ءجون، 1999 -جىلدان بەرى ۇيىمداستىرىلاتىن بۇل مەرەكە تۋريستەر ەڭ كوپ كەلەتىن قىسقى دۋمانعا اينالعان. 6 مىڭ جىلدىق تاريحى بار بۇركىتشىلەر سايىسىن قىزىقتاۋشىلار سانى جىل سايىن كوبەيىپ كەلەدى.

XIII عاسىر ستيلىندە تۇرعىزىلعان «چينگيسيين حۋرەە» تۋريستىك كەشەنىنە بيىل بايان-ولگەي ايماعىنان 20 بۇركىتشى كەلدى. 1300 شاقىرىم قاشىقتىقتان جەتكەن بۇركىتشىلەردىڭ ەڭ ۇلكەنى 88 جاستاعى بايتەي بابي ۇلى بولسا، ولاردىڭ اراسىندا الەمگە ايگىلى بۇركىتشى قىز ايشولپان دا بار.

ەكى كۇنگە سوزىلعان مەرەكەدە قۇس سالۋشىلار ءوز شەبەرلىكتەرىن سىنعا سالدى. سونىمەن قاتار كوكپار ويىنى دا تۋريستەر نازارىنا ۇسىنىلدى.

فەستيۆال قوناقتارى ۇلتتىق ويىندارعا قاتىسىپ، جەرگىلىكتى حالىقتىڭ داستارحانىنان ءدام تاتتى. قازاق قىزدارىنىڭ كيىم تىگۋ، كەستەلەۋ ونەرىن تاماشالادى.

ەستەرىڭىزگە سالا كەتەيىك، 2016 -جىلى يۋنەسكو الەمدەگى 60 ەلدە قۇس سالىپ اڭ اۋلاۋ ءداستۇرىن رەپرەزەنتاتيۆتىك تىزىمگە ەنگىزگەن بولاتىن.