قىز-كەلىنشەكتەر مەرەكەسىنە وراي «استانا وپەرا» مۋزىكالىق شوۋ ۇسىنادى

استانا. قازاقپارات - حالىقارالىق ايەلدەر كۇنىن «استانا وپەرا» جارقىن كونسەرتتىك باعدارلامالارمەن اتاپ وتپەك.

تەاتردىڭ كامەرالىق زالىندا 7 -ناۋرىزدا «مىڭ ءبىر سىرلى سەزىم» مەرەكەلىك كونسەرتى وتەدى، ال 9 -ناۋرىزدا حالىق اتاقتى وتاندىق مۋزىكانت- اسپاپشىلاردىڭ «بيگە شاقىرۋ» كونسەرتىن تاماشالاي الادى، دەپ حابارلايدى قازاقپارات.

تەاتردىڭ باسپا ءسوز قىزمەتىنىڭ حابارلاۋىنشا، كوكتەمگى شۋاقتى مەرەكە قارساڭىندا نازىك جاندىلارعا تەاتردىڭ وپەرا سوليستەرى، حور مەن وركەستر ارتىستەرىنىڭ ورىنداۋىندا تاماشا مۋزىكالىق شوۋ ۇسىنىلماق. قازاقستاننىڭ ەڭبەك سىڭىرگەن قايراتكەرى ءجاميلا جارقىمبايەۆا، حالىقارالىق كونكۋرستاردىڭ لاۋرەاتتارى تاتيانا ۆيسينسكايا، بولات ەسىمحانوۆ، ماليكا مينيزيني، نازىم ساعىنتاي، ەلەنا گانجا، قازاقستاننىڭ ەڭبەك سىڭىرگەن ءارتىسى عاليا بايعازينوۆا، ەرجان سايپوۆ، قازىبەك دوسمۇحامبەتوۆ، ەرۇلان كامەل، اقىلبەك تابىنبايەۆ، المات ىزبامبەتوۆ، ايدا قۇرمانايەۆا، باتىرجان سماقوۆ كامەرالىق زال ساحناسىنا شىعادى. فورتەپيانو پارتياسىن حالىقارالىق كونكۋرستاردىڭ لاۋرەاتى راۋشان بەسكەمپىروۆا ورىندايدى.

«تەاتردىڭ شىعارماشىلىق ۇجىمى اتىنان سۇيىكتى، نازىك، سۇيكىمدى ارۋلاردى وسى ءبىر تاماشا مەرەكەمەن قۇتتىقتايمىن. ەڭ الدىمەن سىزدەرگە زور دەنساۋلىق، باقىت، قۋانىش پەن شاتتىق تىلەيمىن. ماحاببات الەمىندە شىنايى سەزىمگە بولەنىڭىزدەر! ال ءبىز سىزدەرگە كوكتەمگى سازىمىزدى ارنايمىز»، - دەدى بولات ەسىمحانوۆ.

ن. تىلەنديەۆ، ش. قالداياقوۆ، س. مۇحامەدجانوۆ، ە. حاسانعاليەۆ ت. ب. كورنەكتى قازاقستاندىق كومپوزيتورلاردىڭ تۋىندىلارى، وپەرالىق شىعارمالاردان اريالار مەن دۋەتتەر سالتاناتتى كەشتىڭ ءسانىن كەلتىرەدى. بۇعان قوسا، الەمدىك مۋزىكالىق كلاسسيكا جاۋھارلارىنان ۇزىندىلەر، ونىڭ ىشىندە، دج. روسسيني، ي. شتراۋس، ل. دەليب، ف. لەگار، ە. كورنگولد، پ. چايكوۆسكي، ن. ريمسكي-كورساكوۆ، ي. برودسكيدىڭ شىعارمالارى، سونداي-اق تىڭدارمانداردىڭ سۇيىكتى قازاق، ورىس، نەاپوليتاندىق اندەرى مەن رومانستارى شىرقالادى.

كورەرمەندەردىڭ سۇراۋى بويىنشا «استانا وپەرا» تەاترىنىڭ اكىمشىلىگى ساعات 15:00-گە وسى كونسەرتتىڭ قوسىمشا كورسەتىلىمىن قوسقاندىعىن اتاپ وتكەن ءجون.

9 -ناۋرىزدا تانىمال ارتىستەر، حالىقارالىق كونكۋرستاردىڭ لاۋرەاتتارى ەرمەك قۇرمانايەۆ (ۆيولونچەل)، ەۆگەنيا قۇرمانايەۆا (سكريپكا)، انار كامەلينوۆانىڭ (فورتەپيانو) قاتىسۋىمەن «بيگە شاقىرۋ» اتتى اسپاپتىق مۋزىكا كونسەرتى وتەدى.

بۇل كەشتە د. پوپپەردىڭ «تارانتەللا»، «كونسەرتتىك پولونەز»، «ەلفتەر ءبيى»، ك. سەن- سانستىڭ «جانۋارلار كارناۆالى» سيۋيتاسىنان «اققۋ»، گ. ۆەنياۆسكيدىڭ «پولونەز» ، ب. بارتوكتىڭ «رۋمىن بيلەرى»، م. دە فاليانىڭ «يسپان بيلەرى»، ر. شەدريننىڭ «البەنيسكە ەلىكتەۋ»، ا. پياتستسوللانىڭ Le Grand Tango، سونداي-اق بۋەنوس-ايرەستەگى جىل مەزگىلدەرى» تانىمال توپتاماسىنان «كۇز» جانە «قىس» شىعارمالارى ورىندالاتىن بولادى.

 

فوتو: astanaopera.kz