الماتىدا زاعيپ جانداردىڭ ۆەلوماۋسىمى باستالدى - فوتو

الماتى. قازاقپارات - الماتىدا تۇڭعىش پرەزيدەنت پاركىندە زاعيپ ۆەلوسيپەدشىلەردىڭ جاڭا ۆەلوماۋسىمى اشىلدى، دەپ حابارلايدى قازاقپارات ءتىلشىسى.

بۇگىن الماتىدا «شەكاراسىز سپورت» جوباسى اياسىندا مۇمكىندىگى شەكتەۋلى جاندارعا ارنالعان جاڭا ۆەلوماۋسىم اشىلىپ، اشىق جاتتىعۋ ءوتتى.

2016 -جىلى باستالعان جوبا بيىك بەلەستەردى باعىندىرۋدى جوسپارلاپ وتىرعانىن جاريالادى. «شەكاراسىز سپورت» جوباسىنىڭ جەتەكشىسى باحتيار بازاربەكوۆ بيىل جوبا قاتىسۋشىلارى ەۋروپاعا ساپار شەگەتىنىن جەتكىزدى.

«جاڭا ۆەلوماۋسىمنىڭ جاتتىعۋلارى ەندى ءار سەنبى سايىن وتەدى. قاتىسۋشىلارىمىز سەنبى كۇندەرى قاپشاعاي قالاسىنا دەيىن ۆەلوسيپەدپەن بارادى. ءبىز ەندى ترياتلوننان وتەتىن «ىRONMAN 70.3 Astana»  حالىقارالىق سايىسىنا دايىندالامىز. اتالعان سايىس ت م د اۋماعىندا تۇڭعىش رەت وتكەلى وتىر. ول 2018 -جىلدىڭ ماۋسىم ايىندا استانا قالاسىندا بولادى. سونىمەن قاتار، بيىل استانا - پاريج مەجەسىن باعىندىرماقپىز. جالپى جوبا كوز جانارى ناشار كورەتىن جانداردى شابىتتاندىرۋعا ارنالعان. ءبىز مۇمكىندىگى شەكتەۋلى جانداردىڭ بەلسەندى، دەنساۋلىعى مىقتى بولعانىن قالايمىز»، - دەدى باحتيار بازاربەكوۆ.

بۇگىنگى جاتتىعۋعا جوبانىڭ 30 قاتىسۋشىسى كەلدى. ەندى ولار كەلەسى سەنبى قاپشاعاي قالاسىنا دەيىنگى قاشىقتىقتى باعىندىرىپ، الىس جولعا ارنالعان جاتتىعۋلارىن باستايدى. باحتيار بازاربەكوۆ جوباعا جاڭادان قوسىلۋعا تىلەك بىلدىرۋشىلەر بار ەكەنىن ايتتى. مىسالى، بۇگىنگى جاڭا ماۋسىمنىڭ اشىلۋىنا 2 قاتىسۋشى كەلىپ، تىركەلدى.

ەسكە سالا كەتەيىك، زاعيپ جاندار 2016 -جىلى ەرىكتى ۆەلوسيپەدشىلەرمەن بىرگە العاش رەت الىس قاشىقتىقتى باعىندىرعان. وندا جوبا قاتىسۋشىلارى الماتىدان استاناعا بارعان بولاتىن.