«شامامەن، 3-4- ءساۋىر كۇندەرى وتا جاسايمىز. كىشكەنتاي ناۋقاسىمىز 7 جاستا. ونىڭ باس سۇيەگىنىڭ بەت بولىگى قيسىق بولىپ تۋعان. سونى رەتكە كەلتىرىپ، مۇرىن شەمىرشەگىن ورناتامىز جانە تەرىدەگى اقاۋلارمەن جۇمىس ىستەيمىز»، - دەدى حيرۋرگ.
ەسكە سالا كەتسەك، پلاستيكالىق حيرۋرگ ماعزۇم وڭعاروۆ جاعدايى تومەن وتباسىنان شىققان جانە اتا-اناسىز قالعان بالالارعا تەگىن وتا جاسايتىن دارىگەرلەر توبىن جاساقتايتىنىن مالىمدەگەن بولاتىن.
«قۇرمەتتى ارىپتەستەر! ەلىمىزدەگى جاعدايى تومەن وتباسىلاردىڭ ءوز بالاسىنىڭ وتاسى ءۇشىن كۆوتاعا قول جەتكىزە المايتىنىن ءبارىمىز بىلەمىز. اسىرەسە، جەتىم بالالارعا قيىن. بۇل ءبىزدىڭ مينيسترلىكتىڭ كىناسى ەمەس، بۇل قارجىلاندىرۋ مەن بيۋروكراتيزم ماسەلەسى. وسىعان وراي ءبىز الەۋمەتتىك جاعدايى تومەن وتباسىنان شىققان جانە اتا-انا قامقورلىعىنسىز قالعان بالالاردى تەگىن ەمدەيتىن، تەگىن وتا جاساي الاتىن كاسىبي حيرۋرگتار، تراۆماتولوگتار، ۋرولوگتار جانە وزگە سالا ماماندارىنان توپ قۇرامىز»، - دەلىنگەن دارىگەردىڭ فەيسبۋكتەگى پاراقشاسىندا.
سونىمەن بىرگە، م. وڭعاروۆ وتاعا قاجەتتى ءدارى-دارمەكتەر مەن قۇرال-جابدىقتاردى، وزگە قالادان كەلەتىن دارىگەرلەردىڭ جول اقىسى مەن وزگە دە شىعىندارىن ءوزى جۇمىس ىستەيتىن كلينيكانىڭ كوتەرەتىنىن جەتكىزدى.
«بالاسى بار كەز كەلگەن ادام الەۋمەتتىك تۇرعىدا بەلسەندى بولىپ، وزگەلەرگە كومەكتەسۋى قاجەت دەپ ەسەپتەيمىن. قۇرىلتايشىعا جاعدايدى ايتقانىمدا، ءسوزسىز كومەكتەسەتىندەرىن جەتكىزدى. ءبىر ايدا بىرنەشە بالاعا تەگىن وتا جاساۋ ءۇشىن قاراجات ءبولدى»، - دەيدى حيرۋرگ.