اقتوبەدە ءاليا مولداعۇلوۆا تۋرالى فيلم تۇسىرىلە باستادى

اقتوبە. قازاقپارات - قازاقتىڭ باتىر قىزى ءاليا مولداعۇلوۆانىڭ تۋعان جەرىندە فيلم ءتۇسىرىلىپ جاتىر.

قىسقامەتراجدى فيلمنىڭ قىس مەزگىلىندەگى كادرلارىن ءتۇسىرۋ ءۇشىن ارنايى وكوپ قازىلدى، دەپ حابارلايدى قازاقپارات ءتىلشىسى.

اقتوبە وبلىسى قوبدا اۋدانىندا ءاليا مولداعۇلوۆا تۋرالى قىسقامەتراجدى فيلم ءتۇسىرىلىپ جاتىر. «ءاليا - ۇلى دالا ورەنى» اتتى كارتينانى PVE Production كينوكومپانياسى تۇسىرۋدە. ال اقتوبە وبلىسىنىڭ اكىمدىگى، قوبدا اۋدانىنىڭ اكىمدىگى جانە اقتوبە وبلىستىق مادەنيەت، قۇجاتتاما جانە مۇراعاتتار باسقارماسى قولداۋ كورسەتۋدە. قازىرگى ۋاقىتتا ءاليا مولداعۇلوۆانىڭ قان مايدانداعى ەرلىكتەرى مەن ۇرىس قيمىلدارى تاسپالانۋدا. تراكتورمەن ارنايى وكوپتار قازىلدى.

فيلم ءتۇسىرۋ جۇمىستارى اقپان ايىنىڭ اياعىندا باستالدى. العاشقى كادرلار «ءاليا» پاتريوتتىق تاربيە بەرۋ ورتالىعىندا جاسالدى. ءتۇسىرىلىم جاز مەزگىلىندە دە جالعاساتىن بولادى.

«استانادان كينو تۇسىرۋگە ارنايى توپ كەلدى. ولار ءوز ساپارى كەزىندە الدىمەن ءاليا تانۋشى رەتىندە ماعان جولىقتى. ءبىز ولارعا وبلىس ورتالىعىنداعى مۇراجايدى تانىستىرىپ، مالىمەت بەردىك. كەيىن توپ ءاليا اۋىلىنا كەتتى. قازىر قىسقى مەرزىمدەگى كادرلار ءتۇسىرىلىپ جاتىر. مەن باتىر قىزدى سومدايتىن ءارتىستى دە كوردىم. ول كەزدە ءاليا مولداعۇلوۆا 18-19 جاستاعى قىز بولعان. ءبىر بايقاعانىم، كينو تۇسىرۋگە كەلگەن توپ قازاقتىڭ باتىرى تۋرالى جان-جاقتى اقپارات بىلەدى جانە بۇرىن رەسەي جەرىندەگى ىزدەستىرۋ جۇمىستارىنا قاتىسقان ادام»، - دەدى ونداعان جىل بويى ءاليا مولداعۇلوۆانى زەرتتەپ، كىتاپ جازعان عالىمجان بايدەربەس.

ايتا كەتەيىك، قازاقتىڭ باتىر قىزى ءاليا مولداعۇلوۆا ەكىنشى دۇنيەجۇزىلىك سوعىسقا اتتانعاندا نەبارى 19 جاستا بولدى. قولىنا قارۋ الىپ، مەرگەندىك تانىتقان ول 78 جاۋ اسكەرىنىڭ كوزىن جويىپ، كەڭەس وداعىنىڭ باتىرى اتاعىن الدى.

قازىرگى كەزدە اقتوبە قالاسىندا ءاليا مولداعۇلوۆا داڭعىلى بار. سونىمەن قاتار، ءاليا مولداعۇلوۆا اتىنداعى مەديتسينالىق كوللەدجدە ارنايى كورمە زالى ۇيىمداستىرىلعان. قوبدا اۋدانىنىڭ ءاليا اۋىلىندا پاتريوتتىق تاربيە بەرۋ ورتالىعى، مۇراجاي بار.