ۇكىمەت كوميسسياسى قاراباتانداعى ءورتتىڭ سەبەبىن تەكسەرىپ جاتىر
نۇرجان التايەۆ باستاعان ۇكىمەت كوميسسياسى جەتى ادامنىڭ ءومىرىن قيعان ءورتتىڭ سەبەپتەرىن تەكسەرىپ جاتىر. كوميسسيانىڭ قۇرامىنا: ىشكى ىستەر، دەنساۋلىق ساقتاۋ مينيسترلىكتەرىنىڭ، اتىراۋ وبلىسى اكىمدىگى مەن ت ج د وكىلدەرى، جۇمىس بەرۋشى جانە كاسىپوداق مۇشەلەرى كىرگەن.
وقيعا ورنىن تەكسەرگەن سوڭ، ۆيتسە-مينيستر وبلىستىق اۋرۋحانانىڭ حيرۋرگيا بولىمىندە جاتقان ەكى زارداپ شەگۋشىنىڭ حال-جاعدايىن سۇرادى.
«وقيعانىڭ ءمان-جايىن تەكسەرەمىز، جۇمىس بەرۋشىلەردىڭ الدە جۇمىسشىلاردىڭ كىناسىنەن ءورت شىقتى ما - سونى انىقتايمىز. بۇكىل كەلىسىمدەردى تەكسەرىپ جۇمىسشىلارعا قانداي وتەماقىلار قاراستىرىلعانىن انىقتاپ جاتىرمىز»، - دەيدى ن. التايەۆ.
ۆيتسە-مينيستر كومپانيانىڭ باسقا جۇمىسشىلارى تەكسەرىستەر اياقتالعانعا دەيىن ۇيلەرىنە جىبەرىلگەنىن، سونىمەن قاتار ولاردىڭ جالاقىسى ساقتالاتىنىن جەتكىزدى.
ەسكە سالا كەتەيىك، كەشە اتىراۋ وبلىسىندا قاراباتان «گازتۋربينالىق ەلەكتر ستانسىسىنىڭ» قۇرىلىس اۋماعىندا كونتەينەر تيپتەس جاتاقحانا ورتەنگەنى تۋرالى حابارلانعان بولاتىن. الدىمەن ءتورت ادامنىڭ، كەيىن تاعى ەكى ادامنىڭ ءمايىتى تابىلىپ، بۇدان بولەك ءتورت ادام اۋرۋحاناعا جەتكىزىلگەن.
ءورتتىڭ شىعۋىنا الدىن الا بولجام بويىنشا - ەلەكتر سىمدار جۇيەسىنىڭ قىسقا تۇيىقتالۋى سەبەپ بولعانى ايتىلدى.