ەۋروپانى مويىنداتقان امىرە تۋرالى فيلمنىڭ ترەيلەرى شىقتى - فوتو

استانا. قازاقپارات - «امىرە» فيلمىنىڭ ءتۇسىرۋ جۇمىستارى اياقتالدى، دەپ حابارلايدى قازاقپارات «قازاق فيلمگە» سىلتەمە جاساپ.

كينوتۋىندىنىڭ ءتۇسىرۋ توبى كارتينانىڭ ترەيلەرىن جارىققا شىعاردى. امىرە قاشاۋبايەۆتىڭ ءومىر جولىنا ارنالعان كوركەم فيلم 2018-جىلى 5- ساۋىردە ۇلتتىق پروكاتقا شىعادى.

حالىقارالىق ءتۇسىرىلىم توبىنىڭ قۇرامىندا: امەريكالىق قويۋشى- رەجيسسەر دجەف ۆەسپا (Jeff Vespa)، وپەراتور - ماكسيم وسادچيي. فيلمنىڭ سەناريىن جازعان بەنجامين ا. ۆان دەر ۆين. باستى رولدەردى وتاندىق اكتەرلەر سانجار ماديەۆ (امىرە) جانە ەركەبۇلان دايىروۆ (مۇستافا شوقاي) سومداعان. سونىمەن قاتار، بريتاندىق اكتەر بەن الدريدج  جانە امەريكالىق اكتريسا ەببي كورنيش جانە باسقا دا اكتەرلەر تۇسكەن.

كارتينانىڭ باس پروديۋسەرى، DAR كومپانياسىنىڭ نەگىزىن قالاۋشى ءاليدار وتەمۇراتوۆ الداعى تۇساۋكەسەر تۋرالى بىلاي دەدى:

«ءبىز زامانداستارىمىزعا امىرە قاشاۋبايەۆتىڭ قيىن ءومىر جولىن جانە فيلمدە شىرقالاتىن ونىڭ داۋىسىن ەستۋگە مۇمكىندىك بەرگىمىز كەلەدى. امىرەنى جاقىن تانىپ، ۇلتتىق ءداستۇرلى ونەرمەن ەتەنە تانىسقان وتانداستارىمىزدىڭ بويىندا ماقتانىش سەزىمى ويانادى دەپ سەنەمىن. ويتكەنى، ءبىزدىڭ مۋزىكا مادەنيەتىن قالىپتاستىرعان وسىنداي ادامدار، ەسىمدەر ءبىزدىڭ تاريحىمىزدا قالۋعا ءتيىستى. الەم كينەماتوگرافياسىندا مۋزىكا دراماسى جانرىندا تۇسىرىلگەن فيلمدەر كوپ ەمەس. سوندىقتان وتاندىق كورەرمەندەرگە بۇل جانرداعى كارتينانى كورىپ، وتكەن عاسىردىڭ 30-جىلدارىنا ساياحات جاساۋ قىزىقتى بولۋعا ءتيىستى دەپ ويلايمىن. بۇل قازاقستان كينەماتوگرافياسىن جاڭا ساتىعا كوتەرۋگە باعىتتالعان بىرەگەي كارتينا بولماق. وتاندىق كورەرمەندەر جوعارى دەڭگەيدە باعالايدى دەپ ۇمىتتەنەم»، - دەدى كارتينانىڭ باس پروديۋسەرى، DAR كومپانياسىنىڭ نەگىزىن قالاۋشى ءاليدار وتەمۇراتوۆ.

كينوتۋىندى قازاقتىڭ تۇڭعىش درامالىق تەنور داۋىستى ءبىرتۋار ءانشىسى امىرە قاشاۋبايەۆتىڭ (1888-1934 ج.ج.) قامشىنىڭ سابىنداي عانا قىسقا دا، جارقىن عۇمىرىن باياندايدى.

1925-جىلى پاريجدە وتكەن Exposition Internationale des Arts Décoratifs et Industriels Modernes شەڭبەرىندە وتكەن بۇكىلالەمدىك مۋزىكالىق بايقاۋدا ەۋروپا كورەرمەندەرىنە قازاقتىڭ ءداستۇرلى انشىلىك ونەرى مەن قارا دومبىراسىن پاش ەتكەن 36 جاستاعى امىرە قاشاۋبايەۆ ك س ر و دەلەگاتسياسىنىڭ اراسىنان توپ جارىپ، ەكىنشى ورىندى جانە كۇمىس مەدال يەلەندى.

فيلم، سونداي-اق، دارىندى ءانشى امىرە قاشاۋبايەۆتىڭ دجاز ورىنداۋشىسى دجوردج گەرشۆينمەن دوستىعى تۋرالى سىر شەرتەدى.

«امىرە» فيلمى پاريج اسپانىن انگە بولەپ، كۇللى الەمدى تامساندىرعان امىرە قاشاۋبايەۆتىڭ 130 جىلدىعىنا شىققالى وتىر.

فيلمدە امىرە قاشاۋبايەۆتىڭ رەپەرتۋارىنداعى «بالقاديشا»، «ءۇش دوس»، «دۋداراي»، «بەس قاراگەر» جانە ت. ب. اندەرى ورىندالادى.

كارتينا لاتۆيا، لوس-اندجەلەس قالالارىندا ءتۇسىرىلدى. سونداي-اق فيلمنىڭ سوڭعى ءتۇسىرۋ جۇمىستارى الماتى وبلىسى ءۇشقوڭىر اۋىلىنىڭ ماڭىندا جۇرگىزىلدى.

امىرە قاشاۋبايەۆتىڭ ەسىمىن كەڭ ناسيحاتتاۋ ماقساتىندا بىلتىر «امىرە پاريجدە» اتتى كىتاپ جارىق كورگەن بولاتىن.

«امىرە» فيلمى «قازاق فيلمنىڭ» 2018-جىلداعى بىرلەسكەن اۋقىمدى العاشقى جوباسى بولماق. قازىر ق ح ر- مەن بىرلەسكەن «كومپوزيتور» فيلمى مونتاجداۋ كەزەڭىندە تۇر. كوركەم تۋىندى ەكىنشى دۇنيەجۇزى سوعىسىندا الماتىدا ءومىر سۇرگەن قىتايلىق كومپوزيتور سي سين حايدىڭ ءومىرى مەن قازاقتىڭ ۇلى كومپوزيتورى باقىتجان بايقاداموۆ اراسىنداعى دوستىعى تۋرالى باياندايدى.

اتالعان تۋىندىنى مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق جانە ءاليدار وتەمۇراتوۆتىڭ «Dar Play» كومپانياسىمەن بىرلەسە تۇسىرگەن.