شاش نەگە اعارادى؟

 استانا. قازاقپارات - شاشتىڭ ەرتە اعاراتىنىن كوپشىلىك گەنەتيكاعا بايلانىستى دەپ ويلايدى. شىنىمەن، گەنەتيكا كىنالى مە الدە ونى توقتاتۋعا بولا ما؟

 قالىپتى جاعدايدا ەرلەردىڭ شاشى 30-35 جاسىندا، ال ايەلدەردىكى 40-45 جاسىندا اعارا باستايدى. ءبىراق، تاجىريبەدە 30, 25 ءتىپتى، 18 جاستاعى قىزداردا دا اق شاش كەزدەسىپ جاتادى. سونىمەن قاتار، ءتۇسى كەتكەن شاش ۇساق تەسىكتى بولىپ، وندا كوپتەگەن ۇلپىلدىك كوپىرشىكتەر پايدا بولادى. 20 جاستا نەمەسە 40 جاستا بولسا دا، اق شاش شىعۋى ەشكىمگە ۇنامايدى. شاش اعارۋ پروتسەسى قالاي جۇرەدى؟

شاش تۇسىنە اعزادا ەكى پيگمەنت جاۋاپ بەرەدى. ءبىرىنشىسى - ەۋمەلانين، ول قوڭىر جانە قارا رەڭك بەرەدى. ەكىنشىسى - فەومەلانين، قىزعىلت نەمەسە سارعىلت رەڭككە جاۋاپ بەرەدى. شاش ءتۇسى وسى پيگمەنتتەردىڭ ءتۇرلى مولشەردە ارالاسۋىنان پايدا بولادى. شارتتى تۇردە، ونى سۋرەتشىنىڭ پاليتراسىمەن سالىستىرۋعا بولادى. اعزادا دا سولاي بولادى. مىسالى، ەگەر ول ەۋمەلانيندى فەومەلانينگە قاراعاندا كوبىرەك سينتەز جاساسا، شاش قارا رەڭكتى بولادى. قىزىقتى فاكت - ءبىرىنشى بولىپ قارا شاشتىلار، سودان سوڭ قوڭىر شاشتىلار اعارا باستايدى. اقشىل شاشتىلار بۇل ماسەلەمەن كەيىنىرەك كەزدەسەدى. الايدا، بۇل ەرەجە بارلىعىنا بىردەي ەمەس. تابيعي فيزيولوگيادان باسقا ادامنىڭ ءتۇس تيپىنە قاراماستان، ەرتە شاش اعارۋعا اسەر ەتەتىن كوپتەگەن فاكتورلار بار. ەۋمەلانين جانە فەومەلانين پيگمەنتتەرى شاش تۇيىنىندە ورنالاسقان مەلانوتسيت جاسۋشاسىمەن سينتەز جاسايدى. ال مەلانوتسيت ءوز كەزەگىندە قۇرامىندا مىس بار تيروزيناز فەرمەنتى اسەرىمەن كاتاليزدەيدى. «تابيعي» بويالۋ پروتسەسى ءارقاشان جۇرەدى. جاس ۇلعايا كەلە تيروزيناز وڭدەلۋى ازايىپ، ناتيجەسىندە شاش ءتۇسىن «جۋىپ تاستايتىن» سۋتەك توتىعى تۇزىلەدى.

ەرتە شاش اعارۋدىڭ نەگىزگى سەبەپتەرى تيروزيناز وڭدەلۋىنىڭ ازايا باستاۋى گەنەتيكاعا بايلانىستى، ءبىراق وعان سىرتقى فاكتورلار دا اسەر ەتەدى. گەنەتيكا. ەگەر اتا- اناسىنىڭ شاشتارى جاس كەزىندە اعارعان بولسا، وندا بالالارى دا سول ماسەلەمەن باس قاتىرۋى ابدەن مۇمكىن. كۇيزەلىس. جۇيكە كۇيزەلىسى ناتيجەسىندە شاش ءوز بوياۋىن جوعالتادى. قاتتى كۇيزەلىس كەزىندە قانعا كوپ مولشەردە كورتيزول جىبەرىلەدى. ول تيروزينازدىڭ قالىپتى وڭدەلۋىن بۇزىپ، شاش تۇسسىزدەنۋى مۇمكىن. جۇمىستاعى كەدەرگىلەردى ويلاۋ، نەگاتيۆ جانە جاقىن دوستارىڭىزدىڭ ساتىپ كەتۋى وسىعان جاتادى. مۇنداي سەبەپتەر تولىپ جاتىر. اۋرۋ. ەرتە اعارۋعا قاننىڭ ءتۇرلى اۋرۋلار، قالقانشا بەزى جۇمىسىنىڭ بۇزىلۋى، قانت ديابەتى، تەمىردىڭ جەتىسپەۋى جانە گورموندىق بۇزىلۋ اسەر ەتۋى مۇمكىن. سوندىقتان، قانداي دا ءبىر اۋرۋىڭىز بولسا، دارىگەرگە قارالۋدى كەيىنگە قالدىرماعان ءجون. اۆيتامينوز. اعزاعا دارۋمەندەر مەن ميكروەلەمەنتتەردىڭ جەتىسپەۋشىلىگى سەكىلدى قاراپايىم زاتتىڭ ءوزى شاش تۇيىنىنە جانە ونىڭ بوياۋىنا اسەر ەتۋى مۇمكىن. قاتاڭ ديەتا. ەتتەن جانە ءسۇتتى تاعامداردان تولىقتاي باس تارتاتىن ديەتالار شاشقا زيانىن تيگىزەدى. اعارۋدى قالاي توقتاتۋعا بولادى؟ دەنساۋلىقتى جاس كەزدەن باستاپ كۇتۋ كەرەك. بۇل شاش ساۋلىعىنا دا بايلانىستى.

 اعارعان شاشتى ەمدەۋگە بولمايدى، ءبىراق جاڭا اعارعان شاشتىڭ پايدا بولۋىنىڭ الدىن الۋعا بولادى. ول ءۇشىن كەي قاراپايىم ەرەجەلەردى ۇستانۋ كەرەك: - دۇرىس تاماقتانۋ؛ - كۇيزەلىستەن الشاق بولۋ؛ - دارۋمەندەر مەن مينەرالدار جيىنتىعىن ءىشۋ؛ - باس تەرىسىنە ماسساج جاساۋ؛ - شاشتى كۇننەن قورعاۋ؛ - زياندى ادەتتەردەن اۋلاق بولۋ. تابيعي دارىلەر دە شاش اعارۋىن توقتاتۋعا كومەكتەسەدى. سالبەن (شالفەي) ، قالاقاي (كراپيۆا) ، جەنشەن، اسكوك ءدانى، تۇيەجاپىراق (لوپۋح) تامىرى، قىزىل بۇرىش تۇنباسى - ولاردىڭ بارلىعى وسى جاعدايدا كومەككە كەلەتىن ەڭ جاقسى قۇرالدار. ونىڭ بارلىعىن ءدارىحانادان تابۋعا بولادى. وسى قۇرالداردان ماسكا جاساڭىز نەمەسە شاشتى شايىڭىز. ولاردى كەزەكتەسىپ قولدانعان جاقسى.

Massaget.kz