سەلينوگرادتان استاناعا دەيىنگى كەزەڭ جاڭا سەريال سيۋجەتىنە ارقاۋ بولدى

استانا. قازاقپارات - ش. ايمانوۆ اتىنداعى «قازاق فيلم» كينوستۋدياسى رەسەيلىك «ستۋديا كينو» كومپانياسىمەن بىرلەسە وتىرىپ، «ماحاببات. ءۇمىت. استانا» اتتى سەريالدىڭ تۇسىرىلىمدەرىن قولعا الدى، دەپ حابارلايدى قازاقپارات.

كينوستۋديانىڭ باسپا ءسوز قىزمەتى تاراتقان اقپاراتقا سايكەس، ەلوردانىڭ مەرەيتويىنا ارنالىپ تۇسىرىلەتىن ءتورت سەريالدى كوركەم تۋىندى رەسەيدىڭ «پەرۆىي كانال» تەلەارناسىنان كورسەتىلەتىن بولادى. سەريالدىڭ رەجيسسەرلەرى - يۆان گلۋبوكوۆ (رەسەي) جانە ولجاس ەرمەكبايەۆ (قازاقستان). اتالعان فيلم ميستيكا جانە فانتاستيكا ەلەمەنتتەرى بار مەلودراما جانرىندا تۇسىرىلەدى.

«سەريالدىڭ نەگىزگى وقيعاسى 60-جىلدارداعى سەلينوگراد قالاسىندا جانە ارمان قالا رەتىندە كورسەتىلەتىن قازىرگى استانا قالاسىندا ءوربيدى. ەلوردامىز فيلمنىڭ باستى دەكوراتسياسى رەتىندە پايدالانىلىپ قانا قويماي، سونىمەن قاتار، استانالىقتارمەن بىرگە كارتينانىڭ باستى كەيىپكەرى بولماق. فيلمنىڭ ەپيزودتىق رولدەرىنە كاستينگ جاريالادىق، سوندىقتان دا سەريالعا تۇسكىسى كەلگەن ازاماتتارعا قۇلاققاعىس ەتەمىز»، - دەدى سەريالدىڭ رەجيسسەرى ولجاس ەرمەكبايەۆ.

رەجيسسەردىڭ ايتۋىنا قاراعاندا، كاستينگكە جاسى 5 پەن 70 جاس ارالىعىندا بارلىق قازاقستاندىقتار قاتىسا الادى (ەر ادامدار، ايەلدەر جانە بالالار).

«ماحاببات. ءۇمىت. استانا» سەريالىنىڭ تۇساۋكەسەرى 2018-جىلدىڭ 6- شىلدەسىنە - استانا قالاسى كۇنىنە جوسپارلانعان.

ەستەرىڭىزگە سالا كەتسەك، بىلتىر 19- جەلتوقساندا ماسكەۋدە ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن «پەرۆىي كانال» ا ق باس ديرەكتورى كونستانتين ەرنستتىڭ كەزدەسۋى بارىسىندا، ەكى ەل اراسىنداعى كينو يندۋسترياسىن جانە تەلەۆيزيا سالاسىن دامىتۋ بويىنشا ىنتىماقتاستىق جونىندەگى كەلىسىم جاسالىپ، بىرلەسكەن كينوجوبا ءتۇسىرۋ تۋرالى كەلىسىمگە كەلگەن بولاتىن.