شىمكەنتتە پوليتسەيلەر قارت سۋرەتشىنىڭ كومەگىمەن تالاي قىلمىستى اشتى
قىلقالام شەبەرى جارتى عاسىر بويى ىشكى ىستەر ورگاندارىنىڭ قىزمەتكەرلەرىنە قىلمىستاردى اشۋعا كومەكتەسىپ كەلەدى، دەپ حابارلايدى قازاقپارات ءتىلشىسى.
ءوز ءىسىنىڭ مامانى نۇرسەيىت اقساقال بەينەلەۋ ونەرىنىڭ حاس شەبەرى. ول ەلۋ جىلدان استام ۋاقىت بويى ىزدەۋدە جۇرگەن قىلمىسكەرلەردىڭ فوتوروبوتىن سالىپ، قىلمىستىڭ اشىلۋىنا كومەكتەسىپ ءجۇر. سوندىقتان ءتارتىپ ساقشىلارى سۋرەتشىگە كۇدىكتىنىڭ كەلبەتىن قاعازعا ءتۇسىرۋ ءۇشىن ۇنەمى ونىڭ كومەگىنە جۇگىنەدى. وسىلايشا نۇرسەيىت ءالىمباي ۇلى قانشاما قىلمىسكەردىڭ ۇستالۋىنا قولعابىس ەتىپ، ۇستالعاندارى ءوز جازاسىن الۋدا.
ماسەلەن، وتكەن جىلى ءبىر ايەل مەكتەپتەن بالا ۇرلاپ كەتتى. وسى كەزدە قاريا كۋاگەرلەردىڭ ايتۋىمەن كۇدىكتى ايەلدىڭ فوتوروبوتىن سالىپ بەردى. سول ارقىلى كۇدىكتى ايەلدى ءبىر كۇننىڭ ىشىندە پوليتسيا ۇستاپ، قاماۋعا الدى.
بۇدان بولەك اقساقال مەرەكە كۇندەرى گۇل ساتىپ تۇرعان جىگىتتى اتىپ كەتكەن قىلمىستىڭ اشىلۋىنا دا ءوز سەپتىگىن تيگىزدى. ول قىلمىسكەردى تابۋ ءۇشىن وقيعا بولعان جەرگە بارىپ، بازاردا تۇرعان كۋاگەرلەردىڭ ايتۋى بويىنشا كۇدىكتىنىڭ فوتوروبوتىن سالىپ بەرگەن.
ءبىر اپتادان كەيىن سۋرەتى سالىنعان سەزىكتى ءتارتىپ ساقشىلارىنىڭ قولىنا ءتۇستى. قىلقالام يەسى سالعان سۋرەتتىڭ ارقاسىندا قىلمىس اشىلىپ، قىلمىسكەر ءتيىستى جازاسىن الدى.
وسىنداي ەرەن ەڭبەگىن ەسكەرگەن ءال-فارابي اۋدانىنىڭ پوليتسەيلەرى نۇرسەيىت يبراگيموۆقا كاسىبيلىگى مەن ەڭبەكقورلىعى ءۇشىن العىسىن ايتىپ، مىقتى دەنساۋلىق پەن ونەردەگى كاسىبىنە تابىس تىلەدى. ءوز كەزەگىندە سەكسەندى القىمداعان ەل اعاسى پوليتسەيلەرگە ءدان ريزا بولىپ، جۇمىستارىنا تابىس، قىلمىستاردىڭ كوپتەپ اشىلۋىن تىلەدى.