قازاققا كەلىن بولۋدى جازعان تاعدىرىما ريزامىن - ناتاليا ناگوچەۆسكايا
بۇل تۋرالى كوكشەتاۋداعى اقمولا وبلىسى پولياكتارى قوعامدىق بىرلەستىگىنىڭ مۇشەسى ناتاليا ناگوچەۆسكايا ايتتى، دەپ حابارلايدى قازاقپارات ءتىلشىسى.
ناتاليانىڭ ايتۋىنشا، ونىڭ دا اتا-اجەسى سوناۋ 1936 -جىلى دەپورتاتسيا كەزىندە قازاقستانعا جەر اۋدارىلعان ەكەن. ەلدى اشارشىلىق جايلاعان زاماندا قازاقتار ولاردى وزەكتەن تەپكەن جوق. كەرىسىنشە، ءبىر ءۇزىم نان بەرىپ، باۋىرىنداي ىستىق قۇشاعىمەن قارسى الدى. بۇگىنگى كۇنى ونىڭ ءوزى دە اتا- بابالارى باۋىر باسقان قازاق حالقىنىڭ كەلىنى، قازاق جىگىتىنىڭ سۇيىكتى جارى اتانىپ وتىر.
«ماڭدايىما قازاق جىگىتىنىڭ جان جارى بولۋ جازىلدى. ءوز باسىم تاعدىرىما ريزامىن. قازاقتىڭ بەلگىباي ەسىمدى ازاماتىمەن وتباسىن قۇرىپ، ارلان جانە رۋسلان ەسىمدى قوس ۇلىن تاربيەلەپ وتىرمىن. ۇلدارىمىز ەكى حالىقتىڭ دا ەڭ جاقسى قاسيەتتەرىن بويلارىنا ءسىڭىرىپ ءوسىپ كەلەدى. ەكى جاقتىڭ تۋعان-تۋىسقاندارىمەن دە ەتەنە جاقىن ارالاسىپ تۇرامىز. ۇلتىم پولياك بولسا دا، قازاقتىڭ كەلىنى رەتىندە بارلىق ءجون- جورالعىلاردى ورىنداپ، ءۇي ىشىمىزبەن سالت-داستۇرگە قۇرمەتپەن قارايمىز»، - دەيدى ناتاليا ناگوچەۆسكايا.
سونىمەن قاتار كەيىپكەرىمىز، ۇلت بولىپ ۇيىسۋىمىزدىڭ باستى قۇرالى - قازاق ءتىلى بولعاندىقتان، مەملەكەتتىك ءتىلدى مەڭگەرۋدى كەز كەلگەن قازاقستاندىق ءوزىنىڭ ماڭىزدى مىندەتى دەپ ءبىلۋى كەرەكتىگىن ايتۋدا.
«وسىدان ون شاقتى جىل بۇرىن قازاقشا سويلەپ جۇرگەن وزگە ۇلت وكىلدەرىن سيرەك كەزدەستىرۋشى ەدىم. قازىر قاراپ وتىرسام ولاردىڭ قاتارى جىل ساناپ تولىسىپ كەلەدى. قازاق حالقىندا ءتىل دە، تاربيە دە بالانىڭ بويىنا انانىڭ اق سۇتىمەن داريدى دەگەن تۇسىنىك بار. ۇلتىنا قاراماي، اتا- انالارى قاي تىلدە سويلەسە، بالالارى دا سونى ساناسىنا سىڭىرەدى. سوندىقتان، قازاق توپىراعىندا دۇنيەگە ازامات رەتىندە ءوز زامانداستارىمدى قازاق تىلىندە سويلەۋگە، ۇرپاعىمىزدى وتان سۇيگىشتىككە باۋلۋعا شاقىرامىن»، - دەپ ءسوزىن تۇيىندەدى قازاقتىڭ كەلىنى ناتاليا ناگوچەۆسكايا.