ايەلدەر مەرەكەسىنە وراي استانادا «اققۋ كولى» بالەتى ساحنالانادى
تەاتردىڭ باسپا ءسوز قىزمەتىنەن ءمالىم ەتكەندەي، «استانا وپەرا» ترۋپپاسىنىڭ ورىنداۋىنداعى «اققۋ كولى» سپەكتاكلىنىڭ جاڭا رەداكسياداعى پرەمەراسى ماسكاتقا (ومان، 2017) گاسترولدەر اياسىندا كورولدىك وپەرا تەاترىندا وتكەن. شەتەلدىك كورەرمەن ترۋپپانىڭ ونەرىن جوعارى باعالاپ، تولاسسىز شاپالاق سوققان.
«اققۋ كولى» بالەتىنسىز مۋزىكالىق تەاتردى ەلەستەتۋ مۇمكىن ەمەس.
«ءومىر ەشقاشان ءبىر ءتۇستى بولعان ەمەس، ءارقاشان ءتۇرلى رەڭككە يە، ومىردە ادالدىق پەن ماحاببات تا، ساتقىندىق پەن زۇلىمدىق تا كەزدەسەدى. بۇل بالەتتە بارلىعى كورىنىس تاپقان: ودەتتا - اققۋ، تازالىقتىڭ، نازىكتىكتىڭ نىشانى، بۇل ليريكالىق بەينە. وديلليا بولسا، كەرىسىنشە، كەرەعار، زۇلىم، ەلىكتىرگىش، ەسەپشىل، سونىمەن قاتار كورىكتى دە. كورەرمەن تازالىق پەن جاۋىزدىق، ماحاببات پەن ساتقىندىق كۇرەسىنىڭ كۋاسى بولادى. دەگەنمەن سوڭىندا ماحاببات جەڭىسكە جەتىپ، ءبارى ءساتتى اياقتالادى. ءبىز ءبىراز وزگەرىستەر ەنگىزدىك، الايدا ل. يۆانوۆ - م. پەتيپانىڭ كانوندىق قويىلىمىن ساقتاپ قالدىق. «اققۋ كولى» - كلاسسيكالىق بالەتتىڭ نىشانى، الەمدىك برەند. پ. ي. چايكوۆسكييدىڭ مۋزىكاسى - ءبىز ءۇشىن ۇلكەن مۇرا. بۇل بالەت ماڭگى، ونى بىزگە دەيىنگىلەر دە كورگەن جانە وعان ءبىزدىڭ ۇرپاعىمىز دا تامساناتىن بولادى»، - دەدى «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا.
باس پارتيالاردى ءار كۇندەرى «استانا وپەرانىڭ» ارتىستەرى ورىندايدى. ودەتتا - وديلليا - قازاقستاننىڭ ەڭبەك سىڭىرگەن قايراتكەرلەرى، «استانا وپەرانىڭ» جەتەكشى سوليستەرى ايگەرىم بەكەتايەۆا، ءمادينا باسبايەۆا، زيگفريد - كوپتەگەن حالىقارالىق بايقاۋلاردىڭ لاۋرەاتتارى ولجاس تارلانوۆ، ەركىن راحماتوللايەۆ، روتبارت - جانىبەك يمانقۇلوۆ، حالىقارالىق بايقاۋلاردىڭ لاۋرەاتى ارمان ورازوۆ، سايقىمازاق - حالىقارالىق بايقاۋلاردىڭ لاۋرەاتتارى باقتيار ادامجان، سەرىك ناقىسپەكوۆ.
«استانا وپەرا» سيمفونيالىق وركەسترى، ديريجەر - ارمان ورازعاليەۆ.
بالەتتىڭ قويىلىمى 8, 10 جانە 17- ناۋرىز كۇندەرى وتەدى.