سۋ تاسقىنى: قازاقستان جولدارى تاۋلىك بويى باقىلاۋعا الىندى

استانا. قازاقپارات - سۋ تاسقىنىنىڭ الدىن الۋ ءۇشىن رەسپۋبليكالىق ماڭىزى بار تاسجولداردا تاۋلىك بويى پاترۋلدەۋ جۇرگىزىلىپ جاتىر، دەپ حابارلايدى «قازاقپارات» ح ا ا «قازاۆتوجولعا» سىلتەمە جاساپ.

28- اقپاندا جاۋىن-شاشىن مەن قار سۋىنا بايلانىستى الماتى مەن جامبىل وبلىستارىنداعى رەسپۋبليكالىق تاسجولداردا تاسىعان سۋ دەڭگەيىنىڭ كوتەرىلگەنى بايقالعان. قازىرگى تاڭدا سۋ دەڭگەيى تومەندەگەن. بۇل جاعداي اۆتوكولىكتەردىڭ قوزعالىسىنا كەدەرگى كەلتىرمەگەن، دەپ اتاپ ءوتتى اتالعان ۇيىمنىڭ باسپا ءسوز قىزمەتى.

ايتالىق، الماتى وبلىسىندا 24- اقپاننان باستاپ تاسجول ارقىلى سۋدىڭ تاسىعانى 5 رەت جانە رەسپۋبليكالىق تاسجولداردا، اتاپ ايتقاندا ەڭبەكشىقازاق، تالعار، قاراساي جانە جامبىل اۋداندارىندا ەرىگەن قار سۋىنىڭ اۆتوجول بويىندا جينالۋى 6 رەت تىركەلگەن.

جول جوندەۋشىلەردىڭ كومەگىمەن بۇل ماسەلەلەر ءوز شەشىمىن تاپقان.

جامبىل وبلىسىندا تۇرار رىسقۇلوۆ اۋدانىندا الماتى-تاشكەنت-تەرمەز تاسجولىندا، اقىرتوبە ەلدى مەكەنىنە جاقىن جەردە جولدىڭ بويىندا تاسىعان سۋدىڭ جينالۋى بايقالعان. «قازاق اۆتو جول» ج ش س- نىڭ جامبىل وبلىسىنداعى بولىمشەسى شۇعىل تۇردە سۋ تاسقىنىنا قارسى جۇمىستاردى جۇرگىزگەن.

سۋ تاسقىنى بايقالعان تاسجولداردىڭ ۋچاسكەلەرىندە ەشقانداي بۇزۋشىلىق تىركەلمەگەن، جول قىزمەتكەرلەرى تاۋلىك بويى كەزەكشىلىكتە.