الماتى وبلىسىندا وقۋشى قىزدىڭ قولىندا تەك قىتايدا تۋعانىن راستايتىن كۋالىگى عانا بار - فوتو

تالدىقورعان. قازاقپارات - الماتى وبلىسىندا ءناديرا قاتىران ەسىمدى وقۋشى قىز قازاقستاننىڭ ەش جەرىندە تىركەۋدە جوق.

15 جاستاعى جاس ءوسپىرىمنىڭ قولىندا تەك قىتايدا تۋعانىن راستايتىن كۋالىگى عانا بار، دەپ حابارلايدى قازاقپارات ءتىلشىسى.

پانفيلوۆ اۋدانىنىڭ شولاقاي اۋىلىندا تۇرىپ جاتقان ءناديرانىڭ اتا-اناسى بالاسى ق ر ازاماتتىعىن الا الماي قالادى دەپ الاڭداۋلى.

«2004 -جىلى قىتايدىڭ قورعاس اۋدانىنان جانۇيامىزبەن 10 ادام كوشىپ كەلدىك. ولاردىڭ اراسىندا ءبىر جارىم جاستاعى ءناديرا دا بار. سول كەزدە وتباسىنىڭ 9 مۇشەسىن تىركەۋگە العان كوشى-قون پوليتسياسى نارەستەگە كەلگەندە بەيقامدىق تانىتتى. قازىر بالامىز ەش جەردە تىركەۋدە جوق»، - دەيدى ءناديرانىڭ اتاسى قۇرماناقىن قالي.

اتاسىنىڭ ايتۋىنشا، ءناديرا تىركەۋگە الىنباعاننىڭ زاردابىن ەندى تارتىپ جاتىر. قىتايدان العان ءتولقۇجاتى مەن تۋۋ تۋرالى كۋالىگى بولسا دا قازاقستاندا قۇجاتسىزدار ساناتىندا ەكەن. سونىڭ كەسىرىنەن اۋىلدان اتتاپ شىعا المايدى.

 

«بۇل وقۋدا وزات وقۋشىعا وڭايعا ءتيىپ جاتقان جوق. تالاي ءپان وليمپيادالارىنا قۇجاتتىڭ كەسىرىنەن قاتىسا الماي قالدى. وتباسىنىڭ ۇلكەندەرى تىركەۋگە الىنباعان قىزدىڭ ماسەلەسىن ايتىپ تالاي قۇزىرلى ورگانداردىڭ ەسىگىن قاقتىق. الايدا قۇلاق سالعان ەشكىم بولمادى»، - دەيدى اتاسى.

ءناديرا كەلەسى جىلى 16 عا تولادى. ياعني، جەكە كۋالىك الۋى ءتيىس. قۇرماناقىن اتا اۋدان ورتالىعىندا قوعامدىق قابىلداۋ وتكىزگەن وبلىستىق ءماسليحات دەپۋتاتى زاكىرجان كۋزيەۆتەن كومەك سۇرادى. ەندى كوشى-قون پوليتسياسىنداعىلار بۇل ماسەلەنى شەشۋگە قايتا كىرىسپەك. ونىڭ بارىسىن حالىق قالاۋلىسى ءوز باقىلاۋىنا الاتىن بولدى.