تالعار اۋدانىنداعى تۇزدىباستاۋ اۋىلىندا ەرىگەن قار سۋىنان ءبىرقاتار ۇيلەردىڭ اۋلاسىنا سۋ كىرگەن. جاعدايدى ساراپتاعان اكىم جۇمىس ىستەپ جاتقان تەحنيكا سانىن كوبەيتۋدى تاپسىردى. كەرەك بولسا ءورت ءسوندىرۋ كولىكتەرىن دە سۋ سورۋعا جۇمىلدىرۋ قاجەتتىگىن ايتتى.
قاراساي اۋدانىندا اماندىق باتالوۆ قىرعاۋىلدى جانە اباي ەلدى مەكەندەرىنە ات باسىن بۇردى. بۇل جەردە قازىر ەرىگەن قار سۋىنىڭ سالدارىن جويۋعا 3 ەكسكاۆاتور مەن جۇك كولىگى جانە 25 ادام جۇمىس ىستەپ جاتىر. ارىقتاردىڭ ارنالارى تەرەڭدەتىلىپ، جاعاسى قۇم سالىنعان قاپتارمەن بوگەتتەر تۇرعىزىلۋدا. قۇتقارۋشىلار مۇقتاج تۇرعىنداردىڭ بارىنە كومەك كورسەتۋدە.
اۋدان ورتالىعى قاسكەلەڭ قالاسىندا وبلىس اكىمىنە اۋدان اكىمىنىڭ ورىنباسارى، توتەنشە جاعدايلار بويىنشا اۋداندىق كوميسسيا ءتوراعاسى نۇرجان ساتۋبەكوۆ ەسەپ بەردى. قالا كوشەلەرى مەن اۋلالارىنا جينالعان سۋدان تازارتۋ جۇمىستارىنا 100-گە جۋىق ادام جۇمىلدىرىلعان. 10 شاقتى تەحنيكا توقتاۋسىز جۇمىس ىستەۋدە. نۇرجان ساتۋبەكوۆ شامالعان اۋىلىندا دا سۋ باسقانىن ايتىپ ول جەردە دە جۇمىس كۇشەيتىلگەنىن جەتكىزدى. قىزىل سۋ اۋىل ماڭىنداعى القاپتارعا باعىتتالىپ، 80 ادام جۇمىس ىستەپ جاتقانىن مالىمدەدى.
كەشە كەشكە قاراي جامبىل اۋدانى توتەنشە جاعداي جاريالاعان بولاتىن. ءوڭىر باسشىسى وزگەلەردەن كوبىرەك زارداپ شەككەن قاينازار اۋىلىندا دا بولدى. قۇتقارۋشىلار مەن ۇلتتىق گۆارديا جاۋىنگەرلەرىنىڭ جىلدام قيمىلداعانىنىڭ ارقاسىندا سۋ اۋىلدان تىس باعىتقا بۇرىلدى. اماندىق باتالوۆ سۋ كىرگەن بىرنەشە ۇيدە بولىپ تۇرعىندارمەن كەزدەستى. اڭگىمە بارىسىندا بۇل باسپانالار ەشقانداي رۇقساتسىز سالىنعانى انىقتالدى. ەكى ءۇيدىڭ دە قۇجاتتارى تولىق بولماي شىقتى. بىرىندە جالعىز باستى انا، ەكىنشىسىندە سوزىلمالى اۋرۋمەن اۋىراتىن ناۋقاس تۇرىپ جاتىر. ەكى وتباسىنىڭ اۋىر جاعدايى ەسكەرىلىپ، وبلىس اكىمى اۋدان باسشىلارىنا زارداپ شەككەندەرگە بارلىق قاجەتتى كومەك كورسەتۋدى تاپسىردى.
ارنايى قۇرىلعان كوميسسيا ءۇي- ءۇيدى ارالاپ، قىزىل سۋدان زارداپ شەككەندەردىڭ ءتىزىمى جاسالاتىن بولدى. ءوڭىر باسشىسى ساپاردى قورتىندىلاي كەلە جاعداي تولىق سارالانىپ، اكت جاسالعاننان كەيىن قاجەتتى كومەك كورسەتىلەتىنىن تىلگە تيەك ەتتى.
اۆتور: سامال قابىشيەۆا