كاسپي مەن ارالدىڭ تۇبىندە قۇندى زاتتار جاتۋى مۇمكىن - پروفەسسور
«مەنىڭ ويىمشا، ەش نارسەنىڭ ارتىقشىلىعى بولمايدى. مىسالى، ارال كەزىندە كاسپيمەن بىردەي بولىپ جاتقان. ەكەۋى ءبىر تەڭىز بولدى. سوندا ەرتە داۋىردە قىتايدىڭ ەلشىلەرى كەلگەندە جەردىڭ شەتى وسى دەپ ويلاعان. ودان كەيىن اتالعان ەكى تەڭىز ايىرىلدى. ونىڭ وزىندە تالاي تاريح جاتىر»، - دەدى شىعىس قازاقستان مەملەكەتتىك ۋنيۆەرسيتەتىنىڭ پروفەسسور سوۆەتحان يگىبايەۆ قازاقپارات تىلشىسىنە بەرگەن سۇحباتىندا.
پروفەسسوردىڭ ايتۋىنشا، ەرتىس وزەنىنىڭ جاعاسىن دا جان- جاقتى زەرتتەۋ كەرەك. سەبەبى اتالعان وزەننىڭ بويىندا كوپتەگەن ەلدى مەكەندەر مەن بەكىنىستەر بولدى. ال كوشپەندى حالىقتار وزەن ارقىلى قايىقپەن دە، جىلقىعا ءمىنىپ تە دە ءوتىپ تۇردى.
«قايىقتى جىلقىنىڭ قۇيرىعىنا بايلايدى دا ونى سۋعا سالىپ جىبەرەدى. جىلقى ونى ارعى بەتكە الىپ شىعادى. قازىر تۇركيادا سۋدىڭ استىندا كوپتەگەن تاريحي جادىگەرلەردى تاۋىپ جاتىر عوي. بىزدە دە ونداي قۇندى زاتتار تابىلۋى ابدەن مۇمكىن. تابىلۋى مۇمكىن از دۇنيەىنىڭ ءوزى - تاريحي دەرەكتەر. سوندىقتان سۋاستى ارحەولوگيانى دامىتۋ قاجەت دەپ ويلايمىن. بۇگىندە بىزدە ارحەولوگيانىڭ ونداي ءتۇرى كەنجەلەۋ. مەنىڭ ويىمشا، ونى باستاۋ قاجەت»، - دەپ اتاپ ايتتى س. يگىبايەۆ.
فوتو: profvesti.org
اۆتور: ارمان اسقاروۆ