تۇمار پاتشايىم رولىنە نارەستە ىزدەستىرىلىپ جاتىر

الماتى. قازاقپارات - «قازاقفيلم» كينوستۋدياسى «تۇمار پاتشايىم» تاريحي كارتيناسى بويىنشا ساق حانشايىمىنىڭ ءسابي كەزىندەگى ءرولىن سومداۋعا جاڭا تۋعان قىز بالانى ىزدەستىرىپ جاتىر. بۇل تۋرالى قازاقپارات تىلشىسىنە «ساتاي فيلم» كينوكومپانياسىنىڭ كاستينگ ديرەكتورى جاينا ابدىبەك ايتتى.

 شاقالاقتاردىڭ ءتۇر- الپەتى باستى ءرولدى وينايتىن الميرا تۇرسىنعا ۇقساۋى ءتيىس.

 ونىڭ ايتۋىنشا، ازىرگە نارەستە تەك الماتى قالاسىنان ىزدەستىرىلىپ جاتىر.

«تۋعانىنا 5-10 كۇن بولعان نارەستە ىزدەستىرىلىپ جاتىر. ءتۇسىرىلىم الاڭىندا بالاپانعا بار جاعداي جاسالعان. بۇل جەردە جىلى، قاۋىپسىز، ىڭعايلى. كاستينگكە تەك قانا الماتىداعى نارەستەلەر شاقىرىلىپ جاتىر. ويتكەنى، اتا- انالار رەسپۋبليكانىڭ تۇكپىر- تۇكپىرىنەن الماتىعا ەمىزۋلى بالاسىن اكەپ اۋرەگە تۇسپەگەنى دۇرىس. تۇمار پاتشايىمنىڭ نارەستە كەزىندەگى رولگە بىرنەشە بالانى ىرىكتەپ الامىز. سەبەبى، ولاردىڭ ءبارى بىردەي ءتۇسىرىلىم الاڭىنا كەلە الماۋى مۇمكىن»، - دەدى جاينا ابدىبەك.

 سونىمەن قاتار جاقىندا «قازاق فيلم» كينوستۋدياسى 3-7 جاس ارالىعىنداعى قىز بالالارعا كاستينگ جاريالاعان بولاتىن.

 جاينا ابدىبەكتىڭ ايتۋىنشا، قازىر كاستينگتىڭ 2-كەزەڭى باستالدى.

«قازىر ۆيدەوتۇسىرىلىم جۇمىستارى باستالدى. 3, 5, 7 جاس ارالىعىنداعى 463 قىزدىڭ فوتوسى ىرىكتەلىپ الىندى. ال الميرا تۇرسىنوۆاعا قاتتى ۇقسايتىن 10 جاستاعى قىز بەكىتىلدى»، - دەدى ول.

كاستينگ ديرەكتورى بالالارمەن جۇمىس جاساۋدىڭ قيىنشىلىعى تۋرالى دا ايتىپ بەردى.

«ىرىكتەۋ ۆيدەوتۇسىرىلىمدەرى بالالاردى كينوعا دايىنداۋ ءۇشىن وتە قاجەت كەزەڭ. بالا كامەرالارعا، بەتىنە تۇسكەن جارىقتارعا ۇيرەنۋى كەرەك. وسى باعىتتا مەن جانە مەنىڭ اسسيستەنتتەرىم جۇمىس ىستەپ جاتىر»، - دەدى كاستينگ- ديرەكتور.

جاينا ابدىبەكتىڭ ايتۋىنشا، «قازاق فيلم» كينوستۋدياسى كينوعا تۇسەتىن نارەستەلەرگە ناۋرىزدىڭ 5-6 - كۇنى كاستينگ جاريالاماق.

اۆتور: گۇلميرا عوسمانالي