ەندى قازاقستاندىقتار تۇركياعا پويىزبەن بارا الادى

 استانا. قازاقپارات - بۇدان بىلاي قازاقستاندىقتار تۇركيا، گرۋزيا، ءازىربايجانعا جوعارى جىلدامدىقتى پويىزبەن بارا الادى.

 بۇل جوبانى ىسكە اسىرۋ 2018 -جىلدىڭ سوڭىنا دەيىن جوسپارلانعان، دەپ حابارلايدى 24.kz ارناسى.

«ءازىربايجان تەمىر جولدارى» كومپانياسى وتكەن جىلدىڭ قازان ايىندا اشىلعان باكۋ- تبيليسي- كارس باعىتىنداعى جولاۋشىلار پويىزدارىن ىسكە قوسۋدى جوسپارلاپ وتىر. ويدى جۇزەگە اسىرۋ ءۇشىن ماماندار تەحنيكالىق ماسەلەلەردى شەشىپ جاتىر.

«ءازىربايجان اۋماعىنداعى رەلستەردىڭ ولشەمى 1520, ال تۇركيا اۋماعىنداعى رەلس ولشەمى 1435 ميلليمەتردى قۇرايدى. ءبىر رەلستەن ەكىنشى رەلسكە ءوتۋ ءۇشىن پويىزدىڭ دوڭگەلەگىن اۋىستىرۋ كەرەك نەمەسە بۇل ۇدەرىس اۆتوماتتى تۇردە ىسكە اسىرىلاتىنداي ەتۋ كەرەك. بۇل تالاپتارعا سايكەس كەلەتىن ۆاگوندارعا تاپسىرىس بەرىپ قويدىق. جىلدىڭ اياعىنا دەيىن جولاۋشىلاردى تاسىمالداۋدى جوسپارلاپ وتىرمىز» ، - دەيدى «ءازىربايجان تەمىر جولدارى» جابىق اكسيونەرلىك قوعامىنىڭ ءتوراعاسى دجاۆيد گۋربانوۆ.

باكۋ- تبيليسي- كارس باعىتى بويىنشا جۇرەتىن پويىز باستاپقى كەزەڭدە ءبىر ميلليونعا جۋىق جولاۋشىنى تاسىمالداپ، باتىستان شىعىسقا جانە شىعىستان باتىسقا قاراي باراتىن تۋريستەر اعىمىن كوبەيتۋگە ىقپال ەتەدى.

«باكۋ - تبيليسي - كارس باعىتى جىبەك جولى اۋماعىن باسىپ وتەتىندىكتەن، ءتۋريزمنىڭ دامۋىنا زور ۇلەس قوسادى دەپ ويلايمىز. ساياحاتشىلارعا ارنالعان ارنايى پويىز شىعارۋ جوسپاردا بار. بۇل - قازاقستان مەن ازيا مەملەكەتتەرىندەگى تۋريستەر ءۇشىن تۇركيا مەن باسقا دا مەملەكەتتەرگە بارۋىنا ءۇشىن زور مۇمكىندىك» ، - دەيدى ءازىربايجانداعى مادەنيەت جانە تۋريزم مينيسترلىگىنىڭ باسپا ءسوز قىزمەتشىسى ۆۋگار شيحمامەدوۆ.

 

Baq.kz