قازاقستاندا ەلەكتروندى تولەم جاساعاندارعا اقشانىڭ ءبىر بولىگى قايتارىلماق
اتاپ ايتقاندا، «دۇرىس» تولەمدەردى ىنتالاندىرىپ، ترانزاكسيالاردىڭ اشىقتىعىن ارتتىرۋ ماقساتىندا مينيسترلىك ساتىپ الۋشىلارعا بەلگىلى ءبىر پروتسەنتتى قايتارۋدى ۇسىنىپ وتىر.
«ءبىز cash-back ءتاسىلىن قولدانۋدى ۇسىنامىز. ەلەكتروندى تۇردە ترانزاكسيا جاساعان ادامدارعا ق ق س- تان (قوسىمشا قۇن سالىعى) نەمەسە ساتىپ الۋ قۇنىنان بەلگىلى ءبىر پروتسەنتتىڭ قايتارىلعانىن قالايمىز. مەملەكەتتىك كىرىستەر كوميتەتىمەن ۋاعدالاستىق بويىنشا بۇل جوبانى استانانىڭ كوممۋنالدىق نارىعىندا جۇزەگە اسىرىپ كورگىمىز كەلەدى. باقىلاۋ- كاسسالىق اپپاراتتارىن قولدانۋ مىندەتتەلگەن»، - دەدى باۋىرجان بەكەشيەۆ ۆەدومستۆوارالىق كوميسسيا وتىرىسىندا.
ونىڭ ايتۋىنشا، ءاربىر قازاقستاندىق چەك تالاپ ەتۋى ءتيىس جانە بارلىق ساۋدا كاسىپورىندارى باقىلاۋ- كاسسالىق اپپاراتىن قولدانۋى قاجەت.
«ساتىپ الۋشىلاردىڭ ەلەكتروندى ساۋداعا ىنتاسىن ارتتىرۋ ءۇشىن وسىنداي ءادىستى ەنگىزگىمىز كەلەدى. باقىلاۋ- كاسسالىق اپپاراتىنان، ونلاين- ترانزاكسيادان وتكەن ساتىپ الۋ سوماسىنىڭ ءبىر بولىگى قايتارىلادى. ءبىرىڭعاي تولەم جۇيەسى ەشقانداي بانككە جۇگىنبەي- اق، ترانزاكسيالار مەن تولەمدەردى جۇزەگە اسىرۋعا مۇمكىندىك بەرەدى. وعان بارلىق بانك تىركەلەدى جانە كەز كەلگەن ۋاقىتتا ءبىرىڭعاي جۇيە ارقىلى تولەم جاساۋعا بولادى. مۇنىڭ بارلىعى ءسىزدىڭ بيزنەس- سايكەستەندىرۋ ءنومىرىڭىز نەمەسە تۇلعالىق ەسەپشوتىڭىز بويىنشا ەسەپكە الىنادى»، - دەدى بەكەشيەۆ.
سونىمەن بىرگە، ۆيتسە- مينيستر ۇلتتىق بانكتىڭ ءبىرىڭعاي تولەم جۇيەسىنىڭ موبيلدىك قوسىمشاسىن ازىرلەپ جاتقانىن ەسكە سالدى.
«ءبىز ادامي فاكتوردى بارىنشا ازايتۋعا تىرىسامىز. بارلىعى بۇل تۇجىرىمدامانى قالاي ازىرلەيتىنىمىزگە جانە ونىمەن جۇمىس ىستەيتىن ادامدارعا بايلانىستى»، - دەپ تولىقتىردى ءسوزىن مينيستر باسشىسىنىڭ ورىنباسارى.
اۆتور: ايجان سەرىكجان قىزى