ەرلان قارين وتاندىق تەلەۆيزيا تۋرالى: قازاق كورەرمەندەرىنىڭ سالماعى ارتىپ كەلەدى
بۇل تۋرالى «قازمەديا» ورتالىعىندا «قازاقستان» ر ت ر ك» ا ق باسقارما ءتوراعاسى ەرلان قارين ايتتى، دەپ حابارلايدى «قازاقپارات» ح ا ا ءتىلشىسى.
«قازاق اۋديتورياسىنىڭ سالماعى ارتىپ كەلە جاتىر. سونىمەن بىرگە، قازاق تىلىندە جاسالعان جوبالارعا دەگەن سۇرانىس دا كوبەيىپ كەلەدى»، - دەيدى ەرلان قارين «Qazaqstan» ۇلتتىق تەلەارناسىنىڭ الداعى جوبالارى تۋرالى ايتقان سوزىندە.
ول سونىمەن بىرگە، ۇلتتىق ارناعا قاتىستى تاعى ءبىر كورسەتكىشكە نازار اۋدارۋ كەرەكتىگىن اتاپ ءوتتى.
«جاسالعان بارلىق وزگەرىستەردىڭ نەگىزىندە ءبىز تاعى ءبىر ۇلكەن جەتىستىككە قول جەتكىزدىك. جاڭا باعدارلامالاردى ەنگىزۋ ارقىلى، جاڭا تەلەجوبالاردى جۇزەگە اسىرۋدىڭ ارقاسىندا، قوعامدىق، مادەني، گۋمانيتارلىق جوبالاردىڭ ۇلەسىن ارتتىرىپ، رەبرەندينگ شارالارىنىڭ ارقاسىندا ۇلتتىق ارنانىڭ ەفيرىندە باعدارلامالاردىڭ 80 پايىزى - ءوزىمىزدىڭ ءتول ءونىمىمىز بولىپ وتىر. ياعني، باسقا كوپتەگەن ارنالاردا نەگىزىنەن جوبالاردىڭ كوبى سىرتتان ساتىلىپ، ءتىپتى كەيبىر ارنالاردا ولاردىڭ الپىس پايىزى شەتەلدەن الىنسا، ۇلتتىق ارنادا 80 پايىزى ءوز كۇشىمىزبەن، وتاندىق كومپانيالارمەن جاسالعان تەلەجوبالار»، - دەيدى ول.
ەرلان قارين اتالعان كورسەتكىشتى - ۇلتتىق ارنانىڭ نەگىزگى جەتىستىگى دەپ اتادى.
«بۇل ءبىزدىڭ تەليەۆيزيالىق سالانىڭ بۇگىنگى كورەرمەنگە لايىقتى دەڭگەيدەگى ءونىمىن جاساي الاتىن قابىلەتىن كورسەتە الادى. بۇل ۇلتتىق ارنانىڭ الەۋەتىن كورسەتەدى»، - دەپ ءتۇيدى ە. قارين.
اۆتور: ايان بەكەن ۇلى