الماتى وبلىسىندا كۇيىك شالعان بالا ەمدەلۋ ءۇشىن سەۋلگە جىبەرىلدى
«ميلوسەرديە» ەرىكتى قوعامى» قايىرىمدىلىق قورىنىڭ باسشىسى ارۋجان سايننىڭ ايتۋىنشا، كۇيىك شالعان نيكولاي كلاسسەن ەمدەۋدىڭ العاشقى كەزەڭىنەن ءوتۋ ءۇشىن 23 -اقپاندا الەۋمەتتىك جۇمىسشىمەن بىرگە سەۋلگە ۇشىپ كەتكەن.
قوعام بەلسەندىسى بالانىڭ ايىعۋىنا سەنىم ءبىلدىرىپ، كومەكتەسكەندەرگە العىسىن ايتتى.
«www.detdom.kz سايتىندا كوپتەگەن قايىرىمدى جاندار ونلاين رەجيمدە قاراجات اۋداردى، 9099 نومىرىنە سمس جىبەرىپ، جاناشىرلىق تانىتتى. قىسقا ۋاقىت ىشىندە 3852412 تەڭگە قاراجات جينالدى. جاناشىر دەمەۋشىلەرىمىزدىڭ ءبىرى Samruk-Kazyna Trust 30000 مىڭ دوللار قارجى اۋدارادى. بۇدان بولەك، ەسىمىن جاريالاماۋدى سۇراعان تاعى ءبىر دەمەۋشىمىز بار. الماتى وبلىسىنىڭ فەرمەرلەرى ارنايى اۋكسيون وتكىزدى. بارشاڭىزعا راحمەت!»، - دەيدى ارۋجان ساين.
ەسكە سالا كەتەيىك، بالانى 2015 -جىلى پەشتىڭ جارىلۋىنان تۇتانعان ورتتەن كۇيىك شالعان بولاتىن. كەيىن بەلگىلى بولعانداي، ماسكۇنەم اناسى بالا مەن ونىڭ اپكەسىنە دۇرىس قاراماعان، بالالار مەكتەپكە بارماعان. وسى جايت قوعام بەلسەندىسى ارۋجان ساين 2017 -جىلدىڭ جەلتوقسانىندا بالاعا كومەك قاجەت ەكەندىگى تۋرالى جۇرتقا جاريا سالعان سوڭ، ەل ىشىندە ابىرجۋ تۋدىرعان ەدى.
استانادا بالانىڭ قولىنا وتا جاسالدى، ءبىراق دەنەسىنىڭ باسقا بولىكتەرىنە جاساندى تەرى جاپسىرۋ قاجەت ەدى. ول وتا وڭتۇستىك كورەيا استاناسىنداعى «حانگان سونسيم» ەمحاناسىندا جاسالادى.