قازاقستاندىق عالىم ۇلى بريتانيادا ەرەكشە قۇرىلعى ويلاپ تاپتى
بريتانيالىق ساراپشىلار بۇل جاڭالىقتى ريەۆوليۋتسيالىق دەپ، ال ءبىزدىڭ وتانداسىمىزدى ەرەكشە دارىن يەسى دەپ مويىنداپ وتىر.
ديففۋزيالىق ۇياشىق حيميالىق تۇرعىدا بەرىك، «فورمۋلا-1» اۆتوكولىكتەرىندە پايدالانىلاتىن ينجەنەرلىك پلاستيكتەن جاسالعان. قۇرىلعى ءارتۇرلى دارىلىك ونىمدەردى تەستىلەۋ تيىمدىلىگىن ونداعان ەسە ارتتىرىپ، سايكەسىنشە شىعىن كولەمىن ازايتادى.
بۇكىل فارماتسيەۆتيكالىق يندۋستريا قولدانىپ جۇرگەن ءداستۇرلى ۇياشىقتاردى پايدالانىپ جۇرگەن عابيت ءبىر كۇنى ونى ءتيىمسىز دەپ شەشەدى. ويتكەنى ول جۇمىس ىستەيتىن كومپانيا شاعىن، ال مەديتسينالىق قۇرالداردى سىناۋ ۇدەرىسىن تەزدەتۋ قاجەت بولادى.
عابيت نۇرىمبەتوۆ، عالىم- ونەرتاپقىش:
- مەن ونى ويلاپ تاۋىپ، سۋرەتىن سالدىم. ءسويتىپ ءوز ويلارىم تۋرالى باسشىما ايتىپ بەردىم. ول قولداپ، كورەيىك دەدى. ءبىز وعان تاپسىرىس بەرىپ جاسادىق. تۇپنۇسقامەن سالىستىرىپ ەدىك، 100 پايىز سايكەس كەلدى. ياعني وزگەشەلىكتەر مۇلدەم جوق، ءبىراق اناعۇرلىم ناتيجەلى.
پلاتفورمانىڭ اۆتورى عابيت بولعانىمەن، ول «مەن» ەسىمدىگىنەن گورى «ءبىزدى» كوپ قولدانادى. بريتانيالىق ارىپتەستەرى بولسا ونىڭ بولاشاعىنان كوپ ءۇمىت كۇتىپ وتىرعاندارىن ايتادى.
نايدجەل دەۆيس، «Medherant» ۆەنچۋرلىق ورتالىعىنىڭ باس ديرەكتورى:
- عابيت - ينجەنەرياداعى ناعىز دارىندى عالىم. ول كەز كەلگەن ءتۇيىندى ماسەلەنى ءبىتىمى بولەك دۇنيەلەر ويلاپ تابۋ ارقىلى ءتيىمدى شەشۋگە تىرىسادى. ءبىز ءعابيتتىڭ بۇدان دا ىلگەرى باسىپ، تالاي ريەۆوليۋتسيالىق يدەيالاردىڭ اۆتورى بولاتىندىعىنا سەنىمدىمىز.
عابيت ءوزىنىڭ بولاشاعىن تەك قازاقستانمەن بايلانىستىرادى. ول قاجەتتى دەڭگەيدە شەتەلدىك تاجىريبە جيناپ، وتانىنا ورالۋدى جوسپارلاپ وتىر.
عابيت نۇرىمبەتوۆ، عالىم- ونەرتاپقىش:
- قازى- قارتا، ەت تاماقتى قاتتى ساعىنامىن. كەيدە كوزىمە جاس الىپ تا قويامىن. جاقىندا عانا قىركۇيەكتە وتباسىلى بولدىم. قازاقستاننىڭ شاعىن ۇياشىعىن قۇردىق.
عابيت نۇرىمبەتوۆ - شىمكەنتتىڭ تۋماسى. ول قازاقستان- بريتان تەحنيكالىق ۋنيۆەرسيتەتىن اياقتاپ، بريتانيالىق ۋوريك ۋنيۆەرسيتەتىندە پوليمەرلى حيمياداعى فيلوسوفيا بويىنشا دوكتورلىق دارەجەسىن قورعاعان.
اۆتورى: عالىمجان قارامان ۇلى
http://24.kz/kz