سارايشىق ەسكەرتكىشتەرىن عىلىمي زەرتتەۋ جۇمىستارى قولعا الىنادى - مۇحامەدي ۇلى
«دوستارىم، سىزدەردى سارايشىق قالاسىنىڭ ورنىن ساقتاۋ جانە مۇراجايعا اينالدىرۋ جۇمىستارى بارىسىمەن تانىستىرعىم كەلىپ وتىر. ەستەرىڭىزگە سالا كەتسەم، قازىرگى اتىراۋ قالاسىنان 50 ك م قاشىقتىقتا، جايىق وزەنىنىڭ وڭ جاعالاۋىندا ورنالاسقان تەڭدەسى جوق كونە قورىق- مۇراجايدى ساقتاۋ شارالارىن بەلسەندى تۇردە قولعا العانبىز. زەرتتەۋ جانە جۇرگىزىلەتىن جۇمىس نىسانى - وزەن سۋى شايىپ جاتقان قالانىڭ مادەني قاباتتارى ورنالاسقان جايىق وزەنىنىڭ جاعالاۋى» دەلىنگەن حابارلامادا.
مينيستر كەلتىرگەن مالىمەتكە جۇگىنسەك، جوبالىق- سمەتالىق قۇجاتتار 2015 - جىلى جاسالىپ، ودان كەيىنگى جىلدارى №3 ارحەولوگيالىق قازبانى ساقتاپ قويۋ جانە №5 قازبانىڭ ۇستىنە قالقان قۇرۋ جۇمىستارى جۇرگىزىلگەن.
ال 2016 -جىلدىڭ اياعىندا مۇندا قالانىڭ مادەني قاباتتارى بار جاعالاۋدى سۋ تاسقىنىنان قورعاۋ ماقساتىندا دامبا سالۋ جۇمىستارى باستالعان.
«2017 -جىلى جايىق وزەنىنىڭ جاعالارى بەكىتىلىپ، اتىراۋ وبلىسىندا ورنالاسقان تاريحي جانە مادەني ەسكەرتكىشتەردى قورعاۋ ايماعى ايقىندالدى، تاريحي- مادەني مۇرا نىساندارىن ىزدەستىرۋ ءۇشىن دالا ەكسپەديتسيالارى ۇيىمداستىرىلدى، سارايشىق قالاسىنىڭ اينالاسىن قورشاۋ جۇمىستارىنىڭ جوبالىق- سمەتالىق قۇجاتتارى دايىندالدى. سارايشىق قالاسىنداعى جۇمىستار اتىراۋ وبلىسى اكىمدىگى بولگەن قارجىعا جانە وبلىس اكىمى نۇرلان نوعايەۆتىڭ باستاۋىمەن جۇرگىزىلۋدە»، - دەپ جازادى ارىستانبەك مۇحامەدي ۇلى.
سونداي- اق، مينيستر جۇمىستى ورىنداۋشىلار رەتىندە رەسەي فەدەراتسياسىنان، استانا، الماتى، ورال قالالارىنان عالىمدار مەن ماماندار شاقىرىلعانىن اتاپ وتكەن.
«سارايشىق ەسكەرتكىشتەرىن عىلىمي جانە قايتا جاڭعىرتۋ جۇمىستارى جالعاسا بەرەدى، بۇل - اشىق اسپان استىندا مۇراجاي جاساۋعا مۇمكىندىك تۋعىزادى. بيىل №5 قازبادا ساقتاپ قويۋ جۇمىستارىن ورىنداپ، ماڭايىن اباتتاندىرۋ جوسپارلانىپ وتىر. بۇل جۇمىستار بىزگە جەتكەن ەسكەرتكىشتىڭ تاريحي بەينەسىن بارىنشا ساقتاپ قالۋعا باعىتتالعان. بولاشاقتا سارايشىق قازاقستاندىق مەملەكەتتىك جانە حالىقارالىق تۋريستىك مارشرۋتتار جۇيەسىنە قوسىلىپ، دامىپ كەلە جاتقان تۋريستىك ينفراقۇرىلىمىنىڭ ەرەكشە تورابى بولاتىنى ءسوزسىز» دەپ جازىلعان حابارلامادا.
اۆتور: ەربول جانات