جازۋشى كادىربەك سەگىزبايەۆ: قازاق ادەبيەتىنىڭ ءورىسى كەڭەيە باستادى
«بۇگىنگى تاڭدا تاۋەلسىزدىك زامانىندا قازاق جازۋشىلارىنىڭ تۋىندىلارى اعىلشىن تىلىنە اۋدارىلا باستادى. وسى ەڭبەكتى قولعا العان، ەۋروپاعا «التىن كوپىر» سالىپ جاتقان حالىقارالىق قازاق پەن كلۋبىنا العىس ايتقىمىز كەلەدى»، - دەيدى جازۋشى.
كادىربەك سەگىزبايەۆتىڭ ايتۋىنشا، جازۋشىلار مەن اقىنداردىڭ تاعى بىرنەشە كىتاپتارى تۇركيادا دا باسىلىپ شىققان.
«وسىنىڭ ءبارى - قازاق ادەبيەتىنىڭ ءورىسىنىڭ كەڭەيە باستاعانىن كورسەتەدى. جالپى، مەنىڭ ويىمشا، قازاق ادەبيەتى ەشكىمنەن كەم- قور ەمەس، كەندە ەمەس. كەڭەس وكىمەتى كەزىندە ءار رەسپۋبليكادان ءبىر- ءبىر مىقتىلاردى سانالى تۇردە شىعارعان. ورالحاندار دا سول تۇستا كەڭ تۇردە شىڭعىس ايتماتوۆتارداي ناسيحاتتالاتىن بولسا، بالكىم ۇلكەن- ۇلكەن بايگەلەردىڭ الدىن وراپ كەلەر مە ەدى دەپ ويلايمىن. پروزانىڭ وزىندە كەشەگى وتكەن ابىشتەر، ورالحاندار قاي- قايسىسى بولسىن، كەرەمەت پروزايكتەر. ءبىراق، ونىڭ ناسيحاتى مەن دارىپتەلۋى جەتپەي جاتىر»، - دەيدى ول.
جازۋشى سونىمەن بىرگە، جۋىقتا عانا كوز جۇمعان راقىمجان وتاربايەۆتى ەسكە الدى.
«ءبىزدىڭ ورتامىزدا كەشەگى وتكەن راقىمجان وتاربايەۆتار... ول الەمدەگى ەشبىر پروزايكتەن كەم ەمەس. الىبەك (اسقاروۆ - اۆت.) دەگەن ءىنىمىزدىڭ ءوزىنىڭ دە اياق الىسى بولەك. ەۋروپانىڭ، جاپوننىڭ جازۋشىلارىنان كەم دەپ ايتا المايمىن. تەك ناسيحاتىمىز جەتپەي جاتىر. سوندىقتان، بيگەلدى مىرزانىڭ ءىسىن جالعاستىراتىن ازاماتتار كوپ بولىپ، قازاق تىلىندەگى كىتاپتار شەت تىلدەرىنە اۋدارىلا بەرسىن دەگەن تىلەك بىلدىرگىم كەلەدى»، - دەيدى جازۋشى.
ەسكە سالا كەتسەك، بۇگىن ەلوردادا قازاقتىڭ ءبىرتۋار قالامگەرى ورالحان بوكەيدىڭ اعىلشىن تىلىندەگى «كىسى كيىك» كىتابىنىڭ تۇساۋى كەسىلدى. تۇساۋكەسەرگە قازاقستاننىڭ ەڭبەك سىڭىرگەن قايراتكەرى الىبەك اسقاروۆ پەن ەلىمىزگە بەلگىلى جازۋشىلار قۋانىشباي قۇرمانعالي، كادىربەك سەگىزباي كەلدى. سونىمەن بىرگە، ايتۋلى شاراعا كىتاپتى اۋدارعان سايمون حوللينگسۆورت پەن سايمون گەگەن لوندوننان ارنايى ۇشىپ كەلىپ، شاراعا قاتىستى.
اۆتور: ايان بەكەن ۇلى