ب ۇ ۇ قاۋىپسىزدىك كەڭەسىنىڭ ءتوراعاسى قازاقستاننىڭ جۇمىسىنا جوعارى باعا بەردى - فوتو
بيىل قازاقستان مەن كۋۆەيت اراسىنداعى ديپلوماتيالىق بايلانىستاردىڭ ورناتىلۋىنا - 25 جىل. بۇدان بولەك، اتالعان ەلدىڭ ۇلتتىق كۇنى جانە يراكتىڭ قۇرامىنان شىققانىنا 27 جىل تولىپ وتىر، دەپ حابارلايدى قازاقپارات ءتىلشىسى.
رەسمي شارانىڭ اشىلۋ سالتاناتىندا كۋۆەيتتىڭ توتەنشە جانە وكىلەتتى ەلشىسى تاريك ابدۋللا ال- فارادج قازاقستاننىڭ ب ۇ ۇ قاۋىپسىزدىك كەڭەسىندەگى جۇمىسىن ەرەكشە اتاپ ءوتتى. «وتكەن ايدا قازاقستاننىڭ ب ۇ ۇ- نىڭ قاۋىپسىزدىك كەڭەسىندەگى ءتوراعالىعى ءساتتى ءوتتى. سىزدەردىڭ باستامالارىڭىزبەن بەيبىتشىلىك پەن قاۋىپسىزدىككە ۇندەگەن اسا ماڭىزدى ايماقتىق جانە حالىقارالىق ماسەلەلەر كوتەرىلدى. ال، ەڭ باستىسى، كەز كەلگەن شيەلەنىستى ديپلوماتيالىق جولمەن شەشىپ، ىنتىماقتاستىقتى كۇشەيتۋ شارالارىنا باسا نازار اۋدارىلدى. پرەزيدەنت نۇرسۇلتان نازاربايەۆتىڭ توراعالىعىمەن بۇۇ قاۋىپسىزدىك كەڭەسىنىڭ وتىرىسى ۇيىمداستىرىلدى. قازاقستان پرەزيدەنتى ءبارىمىزدى جاپپاي قىرىپ جوياتىن قارۋسىز الەمدى قۇرۋعا ۇندەدى»، - دەپ اتاپ كورسەتتى ەلشى تاريك ابدۋللا ال- فارادج.
ايتا كەتكەن ءجون، وسى ايدا ب ۇ ۇ قاۋىپسىزدىك كەڭەسىنە كۋۆەيت ءتوراعالىق ەتۋدە. وسىعان وراي، ەل استاناسى - ەل- كۋۆەيتتە يراكتى قايتا قۇرۋعا ارنالعان حالىقارالىق كونفەرەنسيا ۇيىمداستىرىلدى. سول جەردە قاتىسۋشى مەملەكەتتەر وسى باستاماعا 30 ميلليارد دوللار ءبولىپ بەرۋگە كەلىستى. بۇدان بولەك، حالىقارالىق كونفەرەنسيا اياسىندا «د ا ي ش»- قا قارسى حالىقىرالىق كواليسيانىڭ مينيسترلىكتەر دەڭگەيىندەگى كەزدەسۋى ءوتتى.
ب ۇ ۇ قاۋىپسىزدىك كەڭەسىنىڭ جۇمىسى جايىندا ايتا كەلە، ەلشى تاريك ابدۋللا ال-فارادج قازاقستان مەن كۋۆەيتتىڭ كوزقاراسى ءبىر ەكەنىن ەرەكشە اتاپ ءوتتى. «25 جىلدىڭ ىشىندە ەكى ەلدىڭ مادەنيەت، ەكونوميكا جانە تاعى باسقا سالالار بويىنشا ءوزارا ىنتىماقتاستىعى كۇشەيىپ كەلەدى. ءبىز وسى بايلانىستاردى دامىتۋعا مۇددەلىمىز. ونىڭ ۇستىنە ب ۇ ۇ قاۋىپسىزدىك كەڭەسى بويىنشا ارىپتەس بولىپ، ورتاق مۇددە ءۇشىن حالىقارالىق ماسەلەلەردى شەشۋگە اتسالىسىپ كەلەمىز»، - دەپ اتاپ كورسەتتى ەلشى مىرزا.
ءوز كەزەگىندە ق ر سىرتقى ىستەر ۆيتسە- ءمينيسترى اقىلبەك قامالدينوۆ كۋۆەيتتىڭ ايماقتاعى اسا ماڭىزدى ارىپتەس مەملەكەت ەكەنىن جەتكىزدى. «بۇگىندە ەكى ەل ءوزارا سەنىمگە نەگىزدەلگەن كونسترۋكتيۆتى ديالوگتىڭ دەڭگەيىنە شىقتى. ءبىز ءبىر-ءبىرىمىزدىڭ ساياسي باستامالارىن قولداپ وتىرامىز. ال ساۋدا- ەكونوميكالىق تۇرعىدا ىنتىماقتاستىق بايلانىستاردى ءالى دە كەڭەيتۋگە بولادى»، - دەدى ا. قامالدينوۆ.