بۇل جونىندە وبلىس باسشىسىنىڭ ورىنباسارى جاقسىلىق ومار فەيسبۋكتەگى ءوز پاراقشاسىندا جازدى، دەپ حابارلايدى قازاقپارات ءتىلشىسى.
«وتكەندە «جەتىسۋ» تەلەارناسىنىڭ «بولمىس» باعدارلاماسىندا گۇلىم نۇركەبايەۆانىڭ تاعدىرىن ەستىگەن ەل ەگىلدى. سودان كەيىن ارنايى انالار ۇيىنە بارىپ، تانىستىم. بار جاعدايدان حاباردار بولعان وبلىس اكىمى اماندىق عابباس ۇلى گۇلىممەن كەزدەسىپ، تالدىقورعاننان پاتەر بەردى. سابيىمەن 6 ايلىق رەابيليتاتسيادان وتكەننەن كەيىن ءوز ۇيىنە يە بولادى»، - دەپ جازعان ج. ومار.
گۇلىم نۇركەبايەۆا كەربۇلاق اۋدانىندا دۇنيەگە كەلگەن. ول 12 جاسىنان باستاپ تۋعان ءسىڭلىسى ەكەۋى «اينالايىن» بالالار ۇيىندە تاربيەلەنگەن. اناسىنان ەرتە ايىرىلعان گۇلىم اكەسىنەن بەيحابار. سوزىنشە، ول ەكى جاستا بولعاندا اناسى اكەسىمەن اجىراسىپ كەتكەن. تاعدىر تالكەگىنە ۇشىراعان ءجاۋدىر كوز ءار جەردە جۇمىس ىستەپ، ءناپاقاسىن تاپقان. كوللەدجدە ءبىلىم الىپ، مامان اتانعان.
24 جاستاعى گۇلىم نۇركەبايەۆانىڭ ايتۋىنشا، التى جىل كوڭىلى جاراسقان جىگىتىنىڭ اتا-اناسى ونىڭ جەتىمدىگىن بەتىنە باسىپ، ۇيلەنۋلەرىنە تۇبەگەيلى قارسىلىق بىلدىرگەن.
«مەنىڭ تۋىستارىم بار، مىنا جەتىم قىزدى كەلىنىم دەپ ەلدەرگە قالاي كورسەتەمىن. ەگەر وسى قىزعا ۇيلەنەتىن بولساڭ، مەن اناڭمەن اجىراسىپ كەتەمىن. تويىمىزعا ءۇش كۇن قالعاندا اكەسى وسىلاي قارسىلىق ءبىلدىردى»، - دەگەن بولاتىن «بولمىس» باعدارلاماسى بارىسىندا گۇلىم.
ونىڭ سوزىنە قاراعاندا، كەيىن سۇيىكتىسىنىڭ ۇيىنە اياعىنىڭ اۋىر ەكەنىن ايتىپ بارعان. ءبىراق جىگىتتىڭ اكە-شەشەسى ءتۇن ورتاسىندا ۇيدەن قۋىپ شىققان. بارار جەرى، باسار تاۋى قالماعان ول قازىر انالار ۇيىندە تۇرىپ جاتىر. ول ءوزىنىڭ تۇرعىلىقتى مەكەن-جايىنىڭ دۇرىس بولماۋىنا بايلانىستى دۇنيەگە كەلگەن بالاسىنا جاردەماقى دا الا الماعان. گۇلىمنىڭ وزىنەن ۇلكەن ەكى اپايى بار.
«ءبىراق ولاردىڭ ماعان كومەك كورسەتەتىن شاماسى جوق»، - دەيدى ول.
ايتا كەتەيىك، الماتى وبلىسىنىڭ اكىمدىگى 2015 -جىلى تالدىقورعاندا 60 پاتەرلى كوپقاباتتى ءۇي سالىپ، اتا-انا قامقورلىعىنسىز قالعان بالالارعا بەرگەن بولاتىن.