مينيسترلىكتەر ءۇيى ماڭىندا جۇرتتىڭ ۇرەيىن ۇشىرعان سومكەنىڭ يەسى تابىلدى

استانا. قازاقپارات - پوليتسەيلەر ءى ءى د جەدەل باسقارۋ ورتالىعىنىڭ ۆيدەوباقىلاۋ كامەرالارىنىڭ كومەگىمەن ماڭگىلىك ەل داڭعىلى مەن دوستىق كوشەسىنىڭ قيىلىسىندا سومكەسىن قالدىرىپ كەتكەن ادامدى انىقتادى، دەپ حابارلايدى قازاقپارات ءتىلشىسى.

«28 جاستاعى ەر ادامنىڭ ايتۋىنشا، ول كولىگىن اۆتوتۇراققا قويىپ كەلگەن سوڭ الۋ ءۇشىن سومكەسىن جاياۋ جۇرگىنشىلەر جولىنىڭ بويىنا قالدىرعان. ۆيدەوباقىلاۋ كامەرالارىنىڭ كومەگىمەن جۇرگىزۋشى جول قوزعالىسى ەرەجەسىن بۇزعانى انىقتالىپ، ق ر اكىمشىلىك قۇقىق بۇزۋشىلىق تۋرالى كودەكسىنىڭ 594-بابى («جول قيىلىستارىنان ءوتۋ قاعيدالارىن بۇزۋ نەمەسە جولدىڭ ءجۇرۋ بولىگىن كەسىپ ءوتۋ») جانە 595-بابى («مانيەۆر جاساۋ قاعيدالارىن بۇزۋ») بويىنشا اكىمشىلىك جاۋاپقا تارتىلدى»، - دەپ مالىمدەدى ءى ءى د باسپا ءسوز قىزمەتى.

بۇگىن پوليتسيا قىزمەتكەرلەرى كۇدىكتى قىتاي سومكەسىنىڭ تابىلۋىنا بايلانىستى مينيسترلىكتەر ءۇيىن قورشاۋعا العانى حابارلانعان بولاتىن.

سومكەنى تەكسەرۋ ءۇشىن وقيعا ورنىنا بىردەن ماماندار جولدانىپ، تەكسەرۋ كەزىندە اتالمىش سومكەنىڭ ىشىنەن كۇدىكتى ەشتەڭە تابىلماعان.