وتاندىق ينتەرنەت- دۇكەندەردىڭ باستى ارتىقشىلىعى نەدە

استانا. قازاقپارات - «قازپوشتا» ا ق- نىڭ ەلەكتروندى ساۋدا جونىندەگى اتقارۋشى ديرەكتورى اسقاربەك الشانبايەۆ وتاندىق ينتەرنەت- دۇكەندەردىڭ باستى ارتىقشىلىعىن ايتىپ بەردى، دەپ حابارلايدى قازاقپارات ءتىلشىسى.

«نەگىزى، ءوزىمىزدىڭ ينتەرنەت- دۇكەندەرىمىز شەتەلدىڭ ونلاين ساۋدا جەلىلەرىمەن باسەكەگە تۇسە الادى. ويتكەنى ءبىزدىڭ بىرنەشە ارتىقشىلىعىمىز بار. ماسەلەن، شەتەلدىڭ ينتەرنەت- دۇكەنى ارقىلى تاپسىرىس بەرگەندە تاۋار، كەم دەگەندە، 10-15 كۇننىڭ ىشىندە جەتكىزىلەدى. قازاقستاندا ونداي تاۋارلاردى كۋرەرلىك كومپانيا ءبىر- ەكى كۇندە، ال پوشتا ەكى- التى كۇننىڭ ىشىندە جەتكىزىپ بەرەدى. ول - ءبىر. ەكىنشىدەن، شەتەلدەن ساتىپ الىنعان تاۋاردى ۇستاۋعا، يا بولماسا، كيىپ كورۋگە مۇمكىندىك جوق. اقشاسىن جىبەرەسىز، ءبىراق ول زات سىزگە كەلە مە، جوق پا، ەشكىم كەپىلدىك بەرە المايدى. ال قازاقستاندا تاپسىرىسپەن العان زاتتى پوشتادا اشىپ كورۋگە بولادى. ۇناسا الاسىز، ۇناماسا، قايتارىپ بەرەسىز»، - دەيدى ا. الشانبايەۆ.

ونىڭ ايتۋىنشا، وتاندىق ينتەرنەت- دۇكەندەردىڭ تاعى ءبىر ارتىقشىلىعى - تولەم جۇيەسى. شەتەلدەن تاۋار الدىرتقاندا اقشانى بىردەن تولەۋ كەرەك. ال قازاقستاندا تاۋار كەلگەننەن كەيىن دە تولەۋگە بولادى.

«بۇگىندە الەم بويىنشا ەلەكتروندى ساۋدا- ساتتىق قىزىپ تۇر. ماسەلەن، وتكەن جىلى تەك قازپوشتا ارقىلى عانا 17 ميلليون سالەمدەمەلەر جەتكىزىلدى. سونىڭ 60 پروتسەنتى ءوزىمىزدىڭ ينتەرنەت- دۇكەندەرىمىزگە تيەسىلى. قالعانى - شەتەلدەن كەلگەن تاۋارلار. «قازاقستاندىقتار ينتەرنەت ارقىلى، كوبىنەسە، تەلەفون تىسقاپتارىن، ساعات، سان الۋان اشەكەي زاتتارىن ساتىپ الادى. سەبەبى ونداي تاۋارلاردى ۇستاپ كورۋدىڭ قاجەتى جوق. بۇدان بولەك، قىمبات گادجەتتەردى دە الىپ جاتادى»، - دەپ اتاپ كورسەتتى ا. الشانبايەۆ.

 ايتا كەتەيىك، بۇگىن «قازپوشتا» اق- نىڭ استاناداعى  «E-Commerce»ورتالىعىندا سيفرلىق تەحنولوگيالارعا ارنالعان سەمينارلار باستالدى. بۇگىنگى شارا ەلەكتروندى ساۋدا جۇرگىزۋ ماسەلەسىنە ارنالدى.

اۆتور: ارمان اسقاروۆ