سەنە الار ەمەسپىن: رەسەيلىك ايەل ورالداعى كوپبالالى وتباسىعا ءۇش بولمەلى پاتەر سىيلادى - فوتو

استانا. قازاقپارات - التى بالا تاربيەلەپ وتىرعان ورال تۇرعىنى كاتيا سكۆورتسوۆايا ءۇش بولمەلى پاتەر كىلتىنە يە بولدى.

كوپبالالى اناعا رەسەيدەگى ءىرى كومپانيا باسشىسى سىي جاساعان.

بۇل تۋرالى «ۋرالسكايا نەدەليا» باسىلىمىنا سىلتەپ Stan.kz حابارلايدى.

وسىدان بىرەر اپتا بۇرىن ب ا ق- تا كوپبالالى وتباسىنىڭ كەشىپ جۇرگەن كۇيى تۋرالى ماقالا جاريالانعان بولاتىن. وندا وتباسىنىڭ نەبارى 9 شارشى مەترلىك ۇيدە تۇرىپ جاتقانى ايتىلعان.

بۇدان كەيىن ورال تۇرعىندارى كوپبالالى وتباسىعا ازىق-تۇلىك، ويىنشىقتار اكەلىپ، اقشالاي كومەك كورسەتە باستادى. الايدا قايىرىمدى جاندار كومەگى مۇنىمەن اياقتالعان جوق. بىرەر كۇن بۇرىن رەسەيدەن ءبىر ايەل حابارلاسىپ، التى بالالى وتباسىعا پاتەر سىيلاعىسى كەلەتىنىن ايتقان. ءسويتىپ، «جۇلدىز» مەنەدجەرى دانار ىدىرىسوۆاعا ءوتىنىش جاساپ، 6 ميلليون تەڭگەگە شاق كەلەتىن ءۇي ىزدەۋدى تاپسىرعان.

قايىرىمدىلىق جاساعان ايەل ەكى تالاپ قويعان: ول ءۇيدى التى بالانىڭ اتىنا جازۋدى جانە ءوز ەسىمىن اتاماۋدى وتىنگەن.

سونىمەن ءۇي پودستەپنوە اۋىلىنان تابىلدى. كۇنى كەشە، 19 -اقپان كۇنى «جۇلدىز» قورى مەن اۋىل تۇرعىنى ماريا اندرەيەۆا اراسىندا ساتىپ الۋ كەلىسىم-شارتىنا قول قويىلدى.

قۇجات راسىمدەلە سالىسىمەن-اق، كاتياعا 3 بولمەلى پاتەردىڭ بۇرىنعى يەسى كىلتتى تابىس ەتتى. كوپبالالى انا كوز جاسىنا ەرىك بەردى.

«بالالارىمنىڭ ءوز ءۇيى بولاتىنىنا ءالى دە سەنە الار ەمەسپىن. بىزگە كومەكتەسكەن ايەلمەن عالامتور ارقىلى سويلەستىم. ونىڭ دا ءتورت بالاسى بار ەكەن، بىزگە دە سول سەبەپتى كومەكتەسىپتى. بالالارىم شالعايداعى ۇيدەن مەكتەپكە قالاي جەتەدى دەپ الاڭداۋشى ەدىم. ەندى ءبىزدىڭ ءۇيىمىز مەكتەپتىڭ جانىندا. ءوزىم ءالى سەنبەي وتىرمىن»، - دەيدى ايەل.

ءۇيدىڭ بۇرىنعى يەسى ماريا اندرەيەۆنا كوپبالالى وتباسىعا كىر جۋۋ ماشيناسىن، اس ءۇي جيھازى مەن جۇمساق ديۆان تاستاپ كەتكەن.

«ءوزىم بالالار ۇيىندە ءوستىم. بىرەۋدىڭ قولداۋىنسىز دۇنيە تابۋدىڭ قانشالىقتى قيىن ەكەنىن بىلەمىن. قايىرىمدى جاندار بۇل وتباسىعا ءۇي سىيلادى، ونىڭ قاسىندا مىنا جيھاز كىشىگىرىم سىيلىق»، - دەيدى اندرەيەۆا.