ق ر ىشكى ىستەر ءمينيسترى سۋ تاسقىنى قاۋپى بار وڭىرلەردى اتادى

استانا. قازاقپارات - قازاقستاننىڭ ءبىرقاتار وڭىرىندە سۋ تاسقىنىڭ ورىن الۋ قاۋپى بار.

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ايتتى، دەپ حابارلايدى قازاقپارات.

«مينيسترلىك جەرگىلىكتى اتقارۋشى ورگاندارمەن بىرگە كوكتەمگى سۋ تاسقىنى قاتەرىن ازايتۋ ءۇشىن كەشەندى شارالار اتقاردى. قازگيدرومەتتىڭ بولجامدى مالىمەتتەرى بويىنشا، جالپى ەلىمىزدە قار كولەمى نورمادان تومەن. دەگەنمەن، سۋ تاسقىنى قاۋپى جەردىڭ كوكتەمگى ىلعالدانۋ دەڭگەيىنىڭ جوعارى بولۋىمەن كۇردەلەنىپ وتىر. قازىرگى ۋاقىتتا جەر توڭىنىڭ قالىڭدىعى 60 سانتيمەتردەن 1,5 مەترگە دەيىن جەتەدى. بۇل وتكەن جىلعى كورسەتكىشتەن ءبىرشاما جوعارى. ءبىراق، قاردىڭ جينالۋى دا جالعاسىپ جاتىر»، - دەدى مينيستر.

ونىڭ دەرەگىنشە، ەڭ كۇردەلى جاعداي مۇزدىڭ ەرىپ، سىرداريا وزەنى سۋىنىڭ دەڭگەيىنىڭ ارتۋىنا بايلانىستى وڭتۇستىك قازاقستان مەن قىزىلوردا وبلىستارىندا بولۋى ىقيمال. سونداي-اق اقمولا، قاراعاندى، قوستاناي جانە سولتۇستىك قازاقستان وبلىستارىندا دا سۋ تاسقىنىڭ ورىن الۋ قاۋپى بار.

«كوكتەمى سۋ تاسقىنى كەزىندە جاعدايدىڭ الدىن الۋ ماقساتىندا ارنايى توپتار قۇرىلدى. 49 مىڭنان استام ادامنان تۇراتىن بولىمدەر جاساقتالدى. 16800 تەحنيكا بار. سۋ تاسقىنى بولعان جاعدايدا حالىقتى ءقاۋىپسىز جەرگە كوشىرۋگە ارنالعان بەكەتتەر انىقتالىپ، باعدارلارى بەلگىلەنگەن. قاجەتتى كولىك قۇرالدارىمەن دە قامتاماسىز ەتىلگەن. ۇلتتىق گۆارديا مەن ىشكى ىستەر مينيسترلىگىنىڭ اسكەري جاساقتارى دا دايىن»، - دەدى قالمۇحانبەت قاسىموۆ.

ءمينيستردىڭ دەرەگىنشە، جەرگىلىكتى اتقارۋشى ورگاندار ەلدى مەكەندەردەن 3,5 ملن توننا تەكشە مەتر قار شىعارعان. 8,5 مىڭ توننا جانارماي، 125 مىڭ توننا قاجەتتى ماتەريالدار بار. اكىمدىكتەر توتەنشە جاعدايلار بولعان جاعدايعا 24,7 ميلليارد تەڭگە دايىنداپ وتىر.