سولتۇستىك كورەيا قايتا اشۋعا ءمىندى
«ەگەر الداعى ۋاقىتتا كورەي تۇبەگىندە احۋال قايتادان قيىنداپ كەتسە، بۇعان ءبىرىنشى كەزەكتە كىنالى ا ق ش بولماق» دەپ جازادى باسىلىمدار. «و باستان ا ق ش ك ح د ر مەن وڭتۇستىك كورەيا اراسىنىڭ جاقسارۋىن قالاعان جوق. ولار جاقسارىپ كەلە جاتقان قاتىناستى بۇزعىسى كەلىپ وتىر. مۇنىسى دۇرىس قادام ەمەس. جاعدايعا مۇلدە كەرى اسەرىن تيگىزەدى» دەپ جازادى «نودون سينمۋن» باسىلىمى. گازەتتىڭ جازۋىنشا، ۆاشينگتون قازىرگى تاڭدا «كورەي تۇبەگى مەن كورشىلەس تەرريتورياعا ستراتەگيالىق كۇشى مەن كوپتەگەن اسكەريلەرىن اتتاندىرىپ جاتىر» . وسىعان وراي پحەنچحاندا ءوتىپ جاتقان قىسقى وليمپيادا ويىندارى اياقتالا سالىسىمەن، سەۋلمەن بىرىككەن اسكەري وقۋ- جاتتىعۋلارىن باستاپ كەتپەكشى.
«ەگەر ا ق ش بولماعاندا، ءبىزدىڭ حالىق ونداعان جىلدار بويى جاسالىپ كەلە جاتقان قىسىمدى سەزبەگەن بولار ەدى. ۇلتتى بىرىكتىرۋ ءوزىمىزدىڭ جەكە مۇمكىندىگىمىزبەن- اق ىسكە اساتىن نارسە. ەگەر ەكى تۋىس ەل اراسىنداعى قارىم- قاتىناس پەن كورەي تۇبەگىندەگى احۋالعا داق تۇسەر بولسا، وندا ونىڭ جاۋاپكەرشىلىگى ا ق ش- تىڭ موينىندا» دەپ جازادى ولار.
قاڭتار ايىندا ك ح د ر مەن وڭتۇستىك كورەيانىڭ شەنەۋنىكتەرى ءوزارا كەزدەسىپ، سولتۇستىك كورەيالىق سپورتشىلاردىڭ قىسقى وليمپياداعا قاتىسۋ ماسەلەسىن رەتتەگەن بولاتىن. ناتيجەسىندە، XXIII قىسقى وليمپيادا ويىندارىنىڭ اشىلۋ سالتاناتىندا ەكى ەلدىڭ سپورتشىلارى ءبىر تۋدىڭ استىندا شىقتى. سونىمەن قاتار ەكى ەلدىڭ حوككەيدەن ايەلدەر قۇراماسى بىرىگىپ، ءبىر كوماندا رەتىندە ايدىنعا شىعىپ جاتىر. وليمپيادا ويىندارىنا بايلانىستى ك ح د ر باسشىسى كيم چەن ىننىڭ تۋىسى كيم ەن نام باستاعان دەلەگاتسيا كورەياعا كەلىپ، اشىلۋ سالتاناتىنا قاتىستى. سونىمەن قاتار دەلەگاتسيا وڭتۇستىك كورەيا پرەزيدەنتى مۋن چجە ينمەن جانە ەلدىڭ پرەمەر- ءمينيسترى لي ناك ەنومەن دە كەزدەستى.
بۇعان دەيىن ا ق ش- تىڭ مەملەكەتتىك حاتشىسى رەكس تيللەرسون ك ح د ر- دىڭ «يادرولىق زىمىرانمەن ا ق ش- تىڭ نەگىزگى تەرريتورياسىن تاس- تالقان ەتەمىز» دەگەن مالىمدەمەسىنە قاتىستى پىكىر بىلدىرگەن.
- بۇل جۇيكەمىزگە تيەدى جانە شەشىم قابىلداۋ مۇمكىندىگىمىزدى نىعايتا تۇسەدى. امەريكالىقتارعا ءدال بۇلاي قىر كورسەتۋ قۇر ساندىراق، - دەگەن ەدى تيللەرسون. ونىڭ سوزىنشە، قازىرگى كەزدە ا ق ش اكىمشىلىگى كەز كەلگەن جاعدايعا دايىن بولۋ ماقساتىندا ءارتۇرلى، ونىڭ ىشىندە اسكەري شارالار جيىنتىعىن دا قاراستىرىپ جاتىر. ءبىراز ۋاقىت بۇرىن رەسەي مەن قىتاي يادرولىق سىناقتار مەن زىمىراندار ۇشىرۋعا قاتىستى ماراتوري جاريالاۋدى سۇراپ، ك ح د ر- عا ۇسىنىس ايتقان. دەگەنمەن ا ق ش- تىڭ ءوزى دە العاشقى كەزەكتە ديپلوماتيالىق قاتىناستاردى رەتكە كەلتىرۋگە تىرىسىپ كورمەك. «باستى ديپلومات رەتىندە ايتارىم، ءبىز ك ح د ر جاقتان ايتىلاتىن ءسوزدى كۇتىپ وتىرمىز. كوپ نارسەنى تىڭدايمىن، ءبىراق ولاردىڭ اربىرىنە جاۋاپ بەرە بەرمەيمىن. ويتكەنى ونىڭ جاۋاپ بەرەتىندەي ەشتەڭەسى دە جوق. قازىر تىڭداۋ ساتىندەمىن، سوندىقتان سىزدەر كەلىسسوزدەرگە دايىن بولىڭىزدار. وزىمدە بار ۋاقىتتى مەيلىنشە پايدالانعىم كەلەدى. العاشقى بومبا تۇسپەيىنشە، ديپلوماتيالىق كۇشەيۋىمىز جالعاسا تۇسپەك. مەنىڭ مىندەتىم - بومبانىڭ ءتۇسۋىن بولدىرماۋ. وعان ءتىپتى قانشا ۋاقىت قالعانىن ءوزىمىز دە بىلمەيمىز» ، - دەيدى حاتشى. وسىعان دەيىن سەناتور بوب كوركەر «ەڭ ءىرى اسكەري شەشىمگە دەيىن ماسەلەنى ديپلوماتيالىق تۇرعىدان شەشىپ الۋ ءۇشىن 9-10-اي ۋاقىت قالدى» دەگەن ەدى.
اباي ايماعامبەت
«ايقىن»