سەمەي اكىمى جولاۋشىلار اۆتوبۋسى اپاتىنىڭ سەبەبىن اتادى

 وسكەمەن. قازاقپارات - سەمەي قالاسىنىڭ اكىمى ەرماك ءسالىموۆ 15-اقپان كۇنى جولاۋشىلار اۆتوبۋسىنىڭ اۋدارىلۋىنا نە سەبەپ بولعانىن ايتتى، دەپ حابارالايدى قازاقپارات ءتىلشىسى.

بۇعان دەيىن حابارلاعانىمىزداي، بەيسەنبى كۇنى سەمەي قالاسىنىڭ شىعىس كەنتىنە بەت العان مارشرۋتتىق اۆتوبۋس اۋدارىلعان بولاتىن. اپات سالدارىنان 3 ادام اۋرۋحاناعا ءتۇستى.

 «وقيعا باقىلاۋ كامەراسىنا ءتۇسىپ قالعان. سوعان قاراپ، اپاتقا جۇرگىزۋشىنىڭ كىنالى ەكەنىن انىقتادىق. اۆتوبۋس سولعا قاراي بۇرىلىس جاسار كەزدە ساعاتىنا 37 شاقىرىم جىلدامدىقپەن كەلە جاتقانى بەلگىلى بولدى. ونىڭ جىلدامدىعى ساعاتىنا 10 شاقىرىمنان اسپاۋى ءتيىس ەدى. سالدارىنان اۆتوبۋس اۋناپ كەتكەن. جولعا كوكتايعاققا قارسى ماتەريال سەبىلگەن. ونىڭ ءبارى ۆيدەودا انىق كورىنىپ تۇر» - دەپ كەلتىرىلگەن ەرماك ءسالىموۆتىڭ سوزدەرى اكىمدىكتىڭ باسپا ءسوز قىزمەتى تاراتقان حابارلامادا.