قۇلاققاپپەن اۋەن تىڭداۋدىڭ ەرەجەلەرى

 استانا. قازاقپارات - كۇن ساناپ دامىعان جاڭا تەحنولوگيالار ادامدى ءوزىنىڭ ىرقىنا باعىندىرىپ بارادى. ول جاسىرىن ەمەس.

كومپيۋتەر مەن تەلەفونسىز جۇمىسىڭنىڭ العا ءجۇرۋى قيىن جانە قۇلاققاپپەن قۇلاعىن بىتەپ الىپ ءوز الەمىندە كەتىپ بارا جاتقان كورىنىسكە دە كوز ۇيرەندى. اتسە دە ونىڭ زيانىن ەسكەرىپ جاتقان ەشكىم جوق. دارىگەرلەر 10-15 جىل بۇرىن ەستۋ دارەجەسىنىڭ تومەندەۋى 40 جاستان اسقاندا باستالسا، قازىر جيىرما جاستان اسقانداردىڭ شاعىمى كوپ دەپ دابىل قاعۋدا. بۇعان قۇلاققاپتىڭ دا ايتارلىقتاي اسەرى بار. قاتتى شىققان دىبىستار ورتاڭعى قۇلاقتىڭ دابىل جارعاعىنا وتە زيان. قۇلاقتىڭ جارعاعى زور دىبىستىڭ ىشكى قۇلاققا ەنۋىنە كەدەرگى كەلتىرەدى. ەگەر قاتتى شىققان دىبىستار تىم ۇزاق ۋاقىت ىشكى قۇلاققا ەستىلە بەرسە، وندا ونىڭ بۇلشىق ەتتەرى السىرەپ، قورعانىش قاسيەتىنەن ايىرىلا باستايدى. ال، بۇل جاعداي ءوز كەزەگىندە ميعا يمپۋلس جىبەرەتىن جاسۋشانىڭ زاقىمدانۋىنا اكەپ سوعادى. دىبىستار توقتاۋسىز ەستىلىپ تۇراتىن بولسا، ول ەستۋ قابىلەتىن ناشارلاتادى.

 - اۋەن تىڭداردا تامشى ءپىشىندى قۇلاققاپتان باس تارتىڭىز. ولاردىڭ دىبىسى ۇلكەن قۇلاققاپتاردان قاتتىراق شىعادى ياعني زيانى كوپ.

- دىبىستىڭ ەڭ جوعارعى شەگى رەتىندە 80 دەتسيبەلل بەلگىلەنگەن. ودان قاتتى شىعىپ تۇرعان دىبىس ەستۋ قابىلەتىنە كەرى اسەر ەتەدى.

 - ءوزىڭىز ءۇشىن اۋەندى 60 دەتسيبەلدەن اسىرماي تىڭداۋعا تىرىسىڭىز.

 - كۇنىنە 1-2 ساعات كولەمىندە عانا اۋەندى قۇلاققاپپەن تىڭداڭىز.

 ەگەر دە «قۇلاق اۋرۋىنا» شالدىقساڭىز، ونىڭ مىناداي بەلگىلەرى بار:

- قۇلاق ۇنەمى شىڭىلداپ تۇرادى؛

- قاتتى شۋدىڭ ءوزى جاي ەستىلەدى؛

 - باسەڭ دىبىستار قاتتى ەستىلەدى؛

- وزىڭىزگە سويلەپ جاتقان ادامدى ءبىر شاقىرىمدا تۇرعانداي ازەر ەستيسىز.

 دەرەككوز: anabol.kz