بويجەتكەن ءوزىن ەر كىسى رەتىندە تانىستىرىپ، بىرنەشە رەت نەكە قۇرعان
ول قالىڭدىق جاساۋى ارقىلى بايلىققا كەنەلۋدى ويلاپ، ءوزىن ەر كىسى رەتىندە تانىستىرىپ، بىرنەشە رەت تۇرمىس قۇرعان، دەپ حابارلايدى BBC News.
پوليتسياعا كريشنا سەننىڭ العاشقى ايەلىنىڭ اتا- اناسى شاعىمدانعان. ولار وزدەرىنىڭ «ەكس- كۇيەۋ بالالارى» قوقان-لوققىمەن قالىڭدىق جاساۋىن بوپسالاعان. ال، بۇعان زاڭمەن تىيىم سالىنعان. ولاردىڭ ايتۋىنشا، الاياق بويجەتكەن جەكە بيزنەسىن اشۋ ءۇشىن ولاردان 850 مىڭ رۋپي (شامامەن 13 مىڭ دوللار) العان، الايدا اقشانى قايتارماعان.
تەرگەۋ كەزىندە كريشنا سەن پوليتسيا قىزمەتكەرلەرىنىڭ كۇدىگىن تۋعىزىپ، ونى مەديتسينالىق تەكسەرۋگە جىبەرگەن. سونىڭ ناتيجەسىندە ونىڭ قىز بالا ەكەندىگى انىقتالعان.
كەيىن بەلگىلى بولعانداي، كريشنا سەن العاشقى ايەلىمەن 2014 -جىلى اجىراسىپ كەتكەندە، 2017 -جىلى ءساۋىر ايىندا قايتادان ۇيلەنگەن.
كريشنا سەنگە تۇرمىسقا شىققان قىزدار ەشتەڭەدەن كۇدىكتەنبەگەن، سەبەبى ول ولاردىڭ كوزىنشە شەشىنبەگەن جانە ولارمەن جىنىستىق قاتىناسقا تۇسپەگەن. ەسەسىنە ول كوپتەگەن جىگىتتەرمەن دوستىق قارىم-قاتىناستا بولىپ، ءتىپتى اجەتحانانىڭ ەر ازاماتتارعا ارنالعان بولىگىن پايدالانعان. ونىڭ ءجۇرىس-تۇرىسى دا ەر ازاماتتارعا ۇقساس بولعان. «شاشىن ەرلەردىڭ ۇلگىسىمەن قيىپ، ەر ازاماتتاردىڭ كيىمىن كيىپ جۇرگەن كريشنا ەشقاشان ايلاناداعىلارىنا كۇدىك تۋدىرماعان»، - دەپ حابارلايدى پوليتسيا قىزمەتكەرلەرى. ول تەرگەۋ كەزىندە ۇنەمى ەركەك بولۋدى قالاعانىن ايتقان.
باسىلىمنىڭ حابارلاۋىنشا، ول بۇرىن سۆيتي (Sweety) دەگەن ەسىممەن بەلگىلى بولعان.
ازىرشە، الاياق بويجەتكەنگە قانداي ايىپتاۋلار تاعىلاتىنى بەلگىسىز.
ءۇندىستاندا 1961 -جىلدان باستاپ قالىڭدىق جاساۋىن بەرۋگە جانە الۋعا تىيىم سالىنعان. الايدا، كوپتەگەن عاسىرلار بويى جالعاسىپ كەلە جاتقان بۇل ءداستۇر ازيانىڭ وڭتۇستىك شىعىس ەلدەرىندە ءالى دە ساقتالۋدا. قىز جاساۋى كوبىنە اقشالاۋ، كيىم جانە ساندىك بۇيىمدار تۇرىندە بەرىلەدى.